ტოპ კლუბსა და დიდ ფინანსებზე უარი ვთქვი - რატომ გადავიდა გოგლიჩიძე ემპოლიში
საქართველოს 21-წლამდე ნაკრებისა და იტალიური „ემპოლის’’ ცენტრალურმა მცველმა საბა გოგლიჩიძემ CrystalSport-თან ვრცელ ინტერვიუში იტალიური კარიერის მნიშვნელოვან დეტალებზე ისაუბრა. ასევე, განმარტა თუ რატომ გააკეთა აქცენტი „ემპოლიზე’’ და რატომ თქვა ფინანსურად და დონით გაცილებით ძლიერ კლუბებზე უარი.
საბა გოგლიჩიძე: „რატომ წავედი „ემპოლიში?’’ არ მინდოდა წასვლა კლუბში, სადაც თუნდაც ოდნავ დაუფასებლობას ვიგრძნობდი. სხვა შემოთავაზებებიც იყო, ფინანსურად გაცილებით სარფიანი, ტოპ კლუბიდან... მაგრამ ბოლომდე მომავალზე და ბოლომდე საფეხბურთო მხარეზე გავაკეთეთ აქცენტი. არც ფული, არც არაფერი, მხოლოდ ის ფიქრი მქონდა და მაქვს, რომ შემიძლია ძალიან დიდი ფეხბურთი ვითამაშო და როცა ლევანთან ერთად ვსაუბრობდი (მჭედლიძე), ამ გზით წავედით ბოლომდე. ჩემი აზრიც ეს იყო და ლევანის აზრიც. ჩვენ შეგვიძლია დიდი ფეხბურთის თამაში და სწორი გზით წავიდეთ. ჯერ „ემპოლი’’ და შემდეგ ნაბიჯები ნელ-ნელა, წინ. ბევრი მაგალითი ვიცით, ვინც იქ ზევით (ტოპ კლუბში) მოხვდა და მერე ჩამოვიდა ქვემოთ. მირჩევნია ჯერ იტალიური ფეხბურთის სპეციფიკა გავიგო, სერია A-სთან ადავპტირდე და შემდეგ მოვხვდე დიდ კლუბში, უფრო მეტად დაფასებულად. „ტორპედოდან’’ პირდაპირ ტოპ კლუბში, მგონი ეს ზედმეტად დიდი ნაბიჯი იქნებოდა''.
საბა „ემპოლიში'' უთამაშებლობის საკითხსაც შეეხო. მისი აზრით, გასულ სეზონში ფიზიკურად მზად არ იყო, ახლა კი ზაფხულში იტალიურ კლუბთან ერთად სრულფასოვანი შეკრება გაიარა და ამხანაგურ მატჩებში მონაწილეობა მიიღო. განსხვავებული სურათია და სერია A-ში თამაშის დიდი იმედი აქვს.
საბა გოგლიჩიძე: „მთელი ბავშვობა 2 ნომერი ვიყავი, „ემპოლიშიც’’ ეს ნომერი ავიღე, თავისუფალი დამხვდა, თუმცა ჯერ ხომ არ მითამაშია. რატომ? ჩემი უთამაშებლობის მთავარი პრობლემა ის იყო, რომ ჩავედი შუა სეზონში. როცა სეზონის დასაწყისში ჩადიხარ, შეკრებაზე ძალიან დიდი დატვირთვებით ვარჯიშობ და ეს შემდეგ მთელი სეზონი გაგყვება, თუმცა მე ეს შეკრება არ გამივლია, კონკურენტებს ფიზიკურად ჩამოვრჩებოდი, მაგრამ ახლა, ამ ზაფხულში, შეკრებას იმ საჭირო დატვირთვებით გავდივარ და ყველაზე მაგარი რაც არის, ამხანაგურ მატჩებს ვმართავთ. შეგიძლია დაამტკიცო, რა შეგიძლია. წინა სეზონში ეს შესაძლებლობა არ მქონია, მაგრამ ახლა სხვა ვითარებაა, ყველაფერი მაგრად მიდის და ძალიან დიდი იმედი მაქვს''.
ინტერვიუ სრულად შეგიძლიათ იხილოთ აქ: უცნობი იტალიური ამბები - გოგლიჩიძის ყველაზე გულწრფელი ინტერვიუ
