მეკარემ მაგარი ბურთი აუღო | ქოჩორაშვილის კარგი მატჩი და დასანანი მარცხი

ლა ლიგა 2-ის 37-ე ტურში „ოვიედომ’’ უშუალო კონკურენტს, „ლევანტეს’’ 1:0 მოუგო. ანგარიში 27-ე წუთზე იგნასი მიკელის ავტოგოლით გაიხსნა და მიუხედავად იმისა, რომ სტუმრებს მეორე ტაიმში დიდი უპირატესობა ჰქონდათ, ეს გოლი გადამწყვეტი აღმოჩნდა.

„ლევანტეს“ სასტარტო 11-ეულში გიორგი ქოჩორაშვილმა შეუცვლელად ითამაშა. 25 წლის ნახევარმცველი შეტევების გამწვავებას ცდილობდა. მატჩის მიწურულს გოლის გატანასთან და თამაშის გადარჩენასთან ახლოს იყო, თუმცა მეკარემ ბრწყინვალე დარტყმა მოიგერია.

32-ე წუთზე ქოჩორაშვილი მეტოქის რამდენიმე ფეხბურთელში შესვლას ცდილობდა, რისკიანი და თამამი გადაწყვეტილება იყო, მცდელობა წარმატებული იყო, თუმცა მისი თანაგუნდელი თამაშგარე მდგომარეობაში აღმოჩნდა.

მსგავსი სახის თამამი გადაწყვეტილება მეორე ტაიმშიც მიიღო, როცა ბურთი თანაგუნდელთან გაითამაშა და შემდეგ ორთაბრძოლისას წაიქცა, თუმცა მსაჯმა თამაშის წესის დარღვევა არ დააფიქსირა. აღნიშნულ ორ შემთხვევაში ქართველი ფეხბურთელის მიზანი დაცვის ხაზის გარღვევა იყო.

მატჩის მიწურულს ქოჩორაშვილს მატჩის გადარჩენა შეეძლო, თუმცა მისი შესანიშნავი დარტყმა მეკარემ მოიგერია.

ქოჩორაშვილის ბრწყინვალე დარტყმა

 

„ლევანტე’’ 66 ქულით მეორე ადგილზეა, ლიდერ „ელჩეს’’ 1 ქულით ჩამორჩება, მესამეადგილოსან „რასინგს’’ 3 ქულით უსწრებს, თუმცა „ელჩესა’’ და „რასინგს’’ მიმდინარე ტურში ჯერ არ უთამაშიათ. „ოვიედო’’ 62 ქულით მე-4 ადგილზეა. ლა ლიგა 2-ში პირველ და მეორე ადგილზე გასული გუნდები პირდაპირ აღზევდებიან, 2-6 ადგილზე გასული გუნდები ფლეი-ოფში ითამაშებენ.

ლა ლიგა 2-ის მომდევნო ტურში, 4 მაისს „ლევანტე'' აუტსაიდერ „ტენერიფეს'' მიიღებს.