„მოსამზადებელი კემპი დაწყებულია“ | როდის იჩხუბებს ილია თოფურია
UFC-ის ქართველმა მებრძოლმა, ილია თოფურიამ მომდევნო ჩხუბისთვის მოსამზადებელი კემპი დაიწყო. „ლეგენდამ“ ამის შესახებ თავად განაცხადა და სოციალურ ქსელებში გამოქვეყნებული პოსტით გვაუწყა, რომ ოქტაგონზე ბრუნდება.
the camp has begun
— Ilia Topuria (@Topuriailia) April 22, 2025
ცნობილი ესპანელი ჟურნალისტის, ალვარო კოლმენეროს ინფორმაციით, რომელიც UFC-ისთან და თოფურიასთან დაახლოებული პირია, ილია მსუბუქი წონითი დივიზიონის საჩემპიონო ქამრისთვის იჩხუბებს. თოფურია ორთაბრძოლას საერთაშორისო ჩხუბის კვირას, 28 ივნისს გამართავს და UFC 317-ის მთავარ მოვლენაში მიიღებს მონაწილეობას.
კოლმენეროს ინფორმაცია Marca-მაც დაადასტურა. ესპანურმა გამოცემამ დასძინა, რომ „ლეგენდას“ მეტოქე ისლამ მახაჩევი ან ჩარლზ ოლივეირა იქნება. „დრიკუს დუ პლესის ტრავმის შემდეგ, UFC-ის ღონისძიების გადარჩენა დასჭირდა. ალეშანდრე პანტოჟასა და კაი კარა ფრანსის საჩემპიონო ორთაბრძოლა საკმარისი არ აღმოჩნდა. UFC-ის ბლოკბასტერი სჭირდებოდა... ილია სწორედ ეს ბლოკბასტერია“, - წერს Marca.
ესპანური გამოცემის მიხედვით, UFC-ი ამ ინფორმაციას ოფიციალურად მალე დაადასტურებს. თოფურია თავადაც ამბობდა, რომ ოლივეირასთვის ან მახაჩევისთვის ემზადებოდა და სატიტულო ჩხუბს მიიღებდა, რაც სიმართლე აღმოჩნდა.
