ბატლერისა და კარის შეუჩერებელი დუეტი | გოლდენ სტეიტმა მემფისს მოუგო
„გოლდენ სტეიტ უორიორსმა“ პლეი-ინის შეხვედრაში „მემფის გრიზლისი“ დაამარცხა და დასავლეთ კონფერენციის მეშვიდე ადგილი დაისაკუთრა. „მეომრებმა“ მეტოქეს დაძაბულ ბრძოლაში, 121:116 სძლიეს და პლეიოფის პირველ რაუნდში, „ჰიუსტონ როქეთსს“ დაუპირისპირდებიან.
„გოლდენ სტეიტის“ რიგებში საუკეთესო ჯიმი ბატლერი იყო, რომელმაც 38 ქულა, 7 მოხსნა და 6 შედეგიანი დააგროვა. „უორიორსის“ მეორე სუპერვარსკვლავს, სტეფ კარის 37 ქულა, 8 მოხსნა და 4 ასისტი ჰქონდა, ხოლო გარი პეიტონმა მატჩი 12 ქულითა და 2 მოხსნით დაასრულა.
„მემფისის“ მხრიდან დესმონდ ბეინი გამოირჩა - 30 ქულა, 6 მოხსნა. ჯა მორანტმა აქტივში 22 ქულა, 3 მოხსნა და ამდენივე ასისტი ჩაიწერა. ჯარენ ჯექსონ ჯუნიორმა 18 ქულა მიითვალა, ხოლო ზაკ ედიმ 14 ქულა, 17 მოხსნა და 2 ასისტი გააკეთა.
ცნობისთვის, „გოლდენ სტეიტთან“ მარცხის შემდეგ, „მემფისი“ მერვე ადგილისთვის იბრძოლებს. „გრიზლისი“ „დალას მავერიქსისა“ და „საკრამენტო კინგსის“ წყვილის გამარჯვებულს დაუპირისპირდება.
