ანჩელოტი: “ახლა ლა ლიგის მოგება უფრო რთული იქნება“

ლა ლიგის მორიგ ტურში მადრიდის რეალმა ვალენსიას უმასპინძლა და 1:2 დამარცხდა. ამ გამარჯვებაში ყველაზე დიდი წვლილი გიორგი მამარდაშვილმა შეიტანა, რომელმაც სამეფო კლუბის ფეხბურთელებს 8-ჯერ არ გაატანინა.

მატჩის დასრულების შემდეგ, ბლანკოსის მთავარმა მწვრთნელმა კარლო ანჩელოტიმ ჟურნალისტებთან ისაუბრა.

ანჩელოტი:

„ახლა ლა ლიგის მოგება უფრო რთული იქნება, მაგრამ ბოლომდე უნდა ვიბრძოლოთ. გაცილებით ნაკლები ვარიანტი გვრჩება, მაგრამ მოსაგებად, რა თქმა უნდა, ყველაფერს გავაკეთებთ. ვინის პენალტი? ვცდილობდი მისთვის თავდაჯერებულობა მიმეცა, მაგრამ მან ვერ გაიტანა.

ფიზიკური პრობლემები არ გვაქვს. უამრავი მომენტი შევქმენით, ცოტა ეფექტურობა გვაკლდა. მოწინააღმდეგისთვის ამ ეტაპზე ჩვენთვის გოლის გატანა სამწუხაროდ ძნელი არ არის, მაგრამ ახლა ჩივილს აზრი არ აქვს. არც დამოკიდებულების პრობლემასთან გვაქვს საქმე. დაუმსახურებლად წავაგეთ.

კურტუა თავს კარგად გრძნობს. ასევე არ გვინდოდა ლუნინით გაგვერისკა. ლონდონში ორივე ჯანმრთელი უნდა გვყავდეს. არ ვფიქრობ, რომ გულშემატკივრების სტვენა ვინიზე იმოქმედებს. ის ყოველთვის ყველაფერს აკეთებს მიუხედავად იმისა, კარგად თამაშობს თუ არა.“

შეგახსენებთ, რომ ამ წაგების შემდეგ მადრიდის რეალს 63 ქულა დარჩა და მეორე ადგილზე იმყოფება. რაც შეეხება ვალენსიას, ღამურებმა 34 ქულას მოუყარეს თავი და ცოცხალ ცხრილში მე-15 პოზიციაზე აღზევდნენ.