კვარა დაცვაში ბრწყინვალე იყო | ენრიკემ ჩემპიონობის შემდეგ ხვიჩაზე ისაუბრა

საფრანგეთის ლიგა 1-ის 28-ე ტურში პსჟ-მ შინ „ანჟე’’ 1:0 დაამარცხა და ჩემპიონატის დასრულებამდე 7 ტურით ადრე ჩემპიონობა გაინაღდა. ლუის ენრიკემ ხვიჩა კვარაცხელია სასტარტოში ათამაშა. მიუხედავად იმისა, რომ კვარას საუკეთესო მატჩი არ ჰქონია, გამარჯვებაში დიდი წვლილი შეიტანა, 55-ე წუთზე მისი ბრწყინვალე ჩაწოდების შემდეგ დუემ ანგარიში გახსნა.

ლუის ენრიკე: „ვფიქრობ, ეს მთელი სეზონის შედეგია. სეზონს რამდენიმე რთული მომენტი ახლდა. ახლა ქომაგებს დიდი სიხარული ვაჩუქეთ. იღბლიანები ვართ, რომ „პარკ დე პრენსზე’’ ვთამაშობთ. გასული სეზონის შემდეგ პუბლიკამ კარგად გაიგო ყველაფერი, რაც ჩვენ გავაკეთეთ. გუნდურად ვმუშაობდით და ახლა ამის შედეგს ვხედავთ.

დიდებული შესაძლებლობაა ისეთი გუნდის ყოლა, რომელსაც ფეხბურთის თამაში ძალიან კარგად შეუძლია. უმაღლესი დონის ფეხბურთელები მყავს, რომლებიც ფეხბურთს თავს უძღვნიან’’.

ლუის ენრიკემ ხვიჩა კვარაცხელიაზეც ისაუბრა: „ჩვენ ვნახეთ კვარაცხელია, რომელმაც დღეს დაცვაში ბრწყინვალედ ითამაშა. ასევე, ვხედავთ მთელ გუნდს, რომელიც გუნდურად დაცვასა თუ შეტევაში ერთიანობას ავლენს. ჩვენი სურვილია 11 ფეხბურთელით თავს ვიცავდეთ და შეტევაშიც 11 ფეხბურთელი მონაწილეობდეს''.

ხვიჩა კვარაცხელია ლუის ენრიკეს გუნდს ზამთარში შეუერთდა, ლიგა 1-ის 10 მატჩში 2 გოლი გაიტანა და 3 საგოლე პასი შეასრულა. ქართველმა ვარსკვლავმა ტოპ 5 ლიგიდან უკვე ორი ჩემპიონატი მოიგო, 2022-23 წლების სეზონში „ნაპოლისთან'' ერთად იტალიის ჩემპიონი გახდა.

ხვიჩა კვარაცხელია პირველი ქართველი ფეხბურთელია, რომელმაც ტოპ 5 ლიგიდან 2 მოიგო.

პარიზულმა გუნდმა საფრანგეთის ჩემპიონობა ისტორიაში მეცამეტედ მოიპოვა (1985–86, 1993–94, 2012–13, 2013–14, 2014–15, 2015–16, 2017–18, 2018–19, 2019–20, 2021–22, 2022–23, 2023–24, 2024–25).

პსჟ ლიგა 1-ის გამარჯვებული ზედიზედ მეოთხედ გახდა.