„გიორგიმ გვიხსნა“ - კორბერანმა მამარდა შეაქო

„სანტიაგო ბერნაბეუზე“ მოგებული მატჩის შემდეგ (2:1) „ვალენსიას“ თავკაცმა, კარლოს კორბერანმა პრესკონფერენცია გამართა, ჟურნალისტების კითხვებს უპასუხა და გამარჯვებაში გიორგი მამარდაშვილის მიერ შეტანილ წვლილზე ისაუბრა.

„ბედნიერი და კმაყოფილი ვარ როგორც შედეგით, ისე ფეხბურთელების თამაშით. საკუთარ თავში გამოვნახეთ საჭირო ხასიათი და მენტალური სიძლიერე, რათა ყველა სირთულე დაგვეძლია. ეს უმნიშვნელოვანესი 3 ქულაა.

ეს იყო გამოცდა გაძლებასა და ძალისხმევაში - როდესაც „რეალი“ ჩვენზე უკეთესი იყო, მამარდაშვილმა გვიხსნა - ის მატჩის ერთ-ერთი საკვანძო ფეხბურთელი იყო. რაც უფრო მეტს ვუტევდით, მით უფრო ახლოს ვიყავით სასურველ შედეგთან.

გულშემატკივრები ასეთ შედეგს იმსახურებდნენ - ისინი მთელი სეზონის განმავლობაში მხურვალედ გვქომაგობენ, ამიტომ ამ გამარჯვებას მათ ვუძღვნი. გვსურდა, გვეთამაშა ისე, რომ მათ გუნდით ეამაყათ.

მოსაგებად ოთხი მთავარი ფაქტორი იყო საჭირო: ხასიათი, მუდმივი ფოკუსირება, გამძლეობა და საკუთარი ძლიერი მხარეების ჩვენება“.

ცნობისთვის, მამარდაშვილი 8 მოგერიებით მატჩის საუკეთესო მოთამაშედ დასახელდა. ამ გამარჯვების შემდეგ, „ვალენსიას“ სატურნირო ცხრილში 34 ქულა დაუგროვდა და კორბერანის გუნდი მე-15 პოზიციაზე აღზევდა.