„სეზონის ერთ-ერთი საუკეთესო მოგერიება იყო“ - Superdeporte მამარდაზე

ესპანური გამოცემა Superdeporte მადრიდის „რეალის“ წინააღმდეგ გიორგი მამარდაშვილის შესანიშნავ თამაშს ეხმიანება.

რას წერს გამოცემა:

„დიახაბიმ და უგო დურომ „ვალენსიას“ გამარჯვება მოუტანეს „რეალთან“ მატჩში, სადაც ღამურების დაცვამ და მამარდაშვილმა მაღალი დონე აჩვენეს. მე-11 წუთზე, პენალტის ეპიზოდში ვინისიუსმა მამარდაშვილს ვერ აჯობა, ორ წუთში კი დიახაბიმ კარლოს კორბერანის გუნდი დააწინაურა.

მბაპემ ქართველი მეკარის რეაქცია რამდენჯერმე გამოცადა, თუმცა, როგორც აღმოჩნდა, ეს მამარდაშვილის დღე იყო. „რეალმა“ ანგარიში გაათანაბრა და მეორე გოლის გატანაც სცადა, თუმცა ფედერიკო ვალვერდეს დარტყმის შემდეგ მამარდაშვილმა სეზონის ერთ-ერთი საუკეთესო მოგერიება შემოგვთავაზა. ქართველი მეკარე სულ უფრო მეტად ემსგავსება თავისი თავის შარშანდელ ვერსიას.

კორბერანმა მოედანზე რაფა მირი, უგო დურო, ფრან პერესი და პეპელუ შეიყვანა, რამაც მატჩის ბოლო წუთებზე „ვალენსიას“ 3 ქულა მოუტანა - მირის პასის შემდეგ „სამეფო გუნდის“ კარი სწორედ დურომ აიღო“.

ცნობისთვის, მამარდაშვილი 8 მოგერიებით მატჩის საუკეთესო მოთამაშედ დასახელდა. ამ გამარჯვების შემდეგ, „ვალენსიას“ სატურნირო ცხრილში 34 ქულა დაუგროვდა და კორბერანის გუნდი მე-15 პოზიციაზე აღზევდა.