წიტაიშვილი აქტიური იყო | გრანადამ ალმერია დაამარცხა

ლა ლიგა 2-ის 34-ე ტურში „გრანადამ“, რომლის ღირსებასაც საქართველოს ნაკრების ფეხბურთელი, გიორგი წიტაიშვილი იცავს, მეშვიდეადგილოსან „ალმერიას“ უმასპინძლა და 3:1 მოიგო.

ანგარიში მე-10 წუთზე გაიხსნა: აბდერაჰმან რებახის წინააღმდეგ წესების დარღვევისთვის დანიშნული 11-მეტრიანი ზუსტად ლუკას ბოიემ გამოიყენა და პირველი ტაიმი მასპინძელთა მინიმალური უპირატესობით დასრულდა.

მეორე ტაიმის დასაწყისშივე „ალმერიამ“ ანგარიში გაათანაბრა: მარჯვენა ფლანგიდან განვითარებული შეტევა ზუსტი დარტყმით გონსალო მელერომ დააგვირგვინა. მე-80 წუთზე გონსალო ვილიარმა ულამაზესი დარტყმით „გრანადა“ დააწინაურა. 84-ე წუთზე კი მიგელ რუბიომ თავური დარტყმით მესამე გოლი გაიტანა.

რაც შეეხება წიტაიშვილს, ფრან ესკრიბამ ის ძირითად შემადგენლობაში დააყენა და 78-ე წუთზე შეცვალა. წიტაიშვილმა Sofascore-ისგან 7,2-იანი შეფასება დაიმსახურა, მისი სტატისტიკა კი ასეთი იყო: 34 შეხება ბურთთან, 20-დან 16 ზუსტი პასი (80%), 1 საკვანძო პასი, 4-დან 2 ზუსტი ჩაწოდება, 1 ზუსტი გრძელი პასი, 1 დარტყმა კარში, 1 დარტყმა კარისკენ, 2-დან 1 წარმატებული დრიბლინგი, 6-დან 3 მოგებული ორთაბრძოლა. გიორგიმ 8-ჯერ დაკარგა ბურთი და ერთხელ დაჯარიმდა.

წიტაიშვილის საუკეთესო მომენტები:

 

34 მატჩის შემდეგ „გრანადა“ 52 ქულით სატურნირო ცხრილის მე-8 ადგილზეა. მომდევნო მატჩს ანდალუსიელები 13 აპრილს, გასვლაზე, „ალბასეტეს“ წინააღმდეგ გამართავენ.

რაც შეეხება წიტაიშვილს, „გრანადას“ მაისურით მას ყველა ტურნირზე 32 მატჩი აქვს ჩატარებული და ქართველი ფეხბურთელის ანგარიშზე 4 გოლი და 3 საგოლე პასია.