8 მოგერიება და მატჩის საუკეთესო ფეხბურთელი - მამარდამ რეალს პირადად მოუგო

ლა ლიგის მორიგ ტურში მადრიდის რეალმა ვალენსიას უმასპინძლა და 1:2 დამარცხდა. ამ გამარჯვებაში ყველაზე დიდი წვლილი გიორგი მამარდაშვილმა შეიტანა, რომელმაც სამეფო კლუბის ფეხბურთელებს 8-ჯერ არ გაატანინა.

მე-13 წუთზე სტუმართა კარში პენალტი დაინიშნა. ბურთთან ვინისიუსი მივიდა, რომლის დარტყმაც ქართველმა კარის დარაჯმა მოიგერია.

ზუსტად 2 წუთში დიახაბიმ ანგარიში გახსნა და ღამურები დააწინაურა. ამის შემდეგ, სამეფო კლუბი კიდევ უფრო მეტად გააქტიურდა და გოლის გატანის კარგი შანსი კილიან მბაპეს ჰქონდა. ამ ეპიზოდშიც მხსნელად გიორგი მამარდაშვილი მოგვევლინა, რომელმაც ეფექტური ნახტომით ფრანგი სუპერვარსკვლავის დარტყმა აიღო.

მეორე ტაიმში მამარდაშვილმა ჯუდ ბელინგემს არ გაატანინა. 50-ე წუთზე ვინისიუსმა წონასწორობა აღადგინა, თუმცა აქ გიორგი უძლური იყო.

ანგარიშის გათანაბრების შემდეგ, ბლანკოსმა მთლიანად მოიპოვა ტერიტორიული უპირატესობა და ვალენსია მამარდაშვილის იმედად დარჩა, რომელმაც საოცარი ბურთები მოიგერია.

გამორჩეული მომენტი იყო ფედე ვალვერდეს დარტყმა. ჯვაროსნების მეკარემ ფაქტობრივად მკვდარი ბურთი აიღო. მატჩის მიწურულს, რუდიგერი მამარდაშვილთან პირისპირ დარჩა და მისი დარტყმაც გააუვნებელყო. სრულიად დამსახურებულად, ქართველი შეხვედრის საუკეთესო ფეხბურთელად დასახელდა.

მსაჯის მიერ კომპენსირებულ დროში, მასპინძლები მთლიანად შეტევაში იყვნენ გადასულები, რა დროსაც კონტრ-შეტევა გაეპარათ და ჰუგო დურომ გამარჯვების მომტანი გოლი გაიტანა.

ამ გამარჯვების შემდეგ, ვალენსიას სატურნირო ცხრილში 34 ქულა დაუგროვდა და მე-15 პოზიციაზე აღზევდა. რეალს კი 63 ქულა დარჩა და მეორე ადგილზე იმყოფება.