დინამომ გაგრას აჯობა - ნინუა საუკეთესო იყო

Crystalbet ეროვნული საფეხბურთო ლიგის VI ტური „დავით პეტრიაშვილი არენაზე“ დაიწყო, სადაც „გაგრამ“ თბილისის „დინამოს“ უმასპინძლა და ქვეყნის ყველაზე ტიტულოვან კლუბთან 0:4 დამარცხდა. საინტერესოა ის ფაქტი, რომ გაგრელებს მიმდინარე ჩემპიონატში მხოლოდ ერთი მოგება აქვთ და ისიც გასვლაზე, საკუთარ სტადიონზე ჩატარებული ოთხი მატჩიდან კი სამი წააგო და ერთი ფრედ დაასრულა.

გამარჯვებულებს შორის საუკეთესო ნიკოლოზ ნინუა იყო, რომელმაც 7-წუთიან ინტერვალში ორი გოლი შექმნა. მან ჯერ საფირმო შორეული დარტყმით გახსნა ანგარიში, ხოლო შემდეგ მისი ჩაწოდების შემდეგ თავური დარტყმით ლეო ასუნსაომ აიღო მასპინძლების კარი.

რაც შეეხება მეორე ტაიმს, 78-ედან მე-80 წუთამდე „გაგრას“ ფეხბურთელმა ილია კაციაშვილმა ორი ყვითელი ბარათი მიიღო და გააძევეს, რის შემდეგაც სტუმართა იერიშები  უფრო მწვავე გახდა და მასპინძლების კარში კიდევ ორი ბურთი გავიდა. ჯერ ვახტანგ სალიამ ბოჰდან პოტალოვის გადაცემა გამოიყენა, ხოლო საბოლოო წერტილი 19 წლის თემურ ოდიკაძემ დასვა, რომელმაც „დინამოში“ სადებიუტო გოლი გაიტანა.

მომდევნო ტურში საქართველოს ყველაზე ტიტულოვანი კლუბი თბილისის დერბიში „იბერიას“ უმასპინძლებს, ხოლო სტუმრად „გარეჯს“ შეხვდება.