„პოლიტიკური გადაწყვეტილებაა“ - ტებასი ოლმოს და ვიქტორის რეგისტრაციაზე

ლა ლიგის პრეზიდენტმა, ხავიერ ტებასმა ესპანეთის სპორტული სასამართლოს (CSD) გადაწყვეტილებას „ბარსელონას“ ფეხბურთელების, დანი ოლმოსა და პაუ ვიქტორის რეგისტრაციის დაშვებასთან დაკავშირებით არა სამართლებრივი, არამედ პოლიტიკური უწოდა.

ტებასის თქმით, ის არ ეთანხმება მიდგომას, რომელიც ამ საქმეზე CSD-მ გამოავლინა.

რას ამბობს ლა ლიგის პრეზიდენტი:

„ჩვენი უარი ოლმოს და ვიქტორის რეგისტრაციაზე ეფუძნებოდა იმ ავტომატიზებულ პროცედურებს, რომლებიც უკვე არაერთი სეზონი მოქმედებს და ოფიციალურად აღიარებულა CSD-ის მიერ. ეს გადაწყვეტილება კომპეტენტურმა ორგანომ მიიღო, არ იყო ვინმეს მხრიდან გასაჩივრებული და ამიტომ, ჩემი აზრით, ძალაში რჩება.

მიუხედავად ამისა, CSD-მ ბათილად ცნო მონიტორინგის კომისიის დასკვნა, რომელშიც უბრალოდ აღიარებული იყო ისედაც არსებული წესები, და ამ ორგანოს „აშკარად არაკომპეტენტური“ უწოდა.

ჩემი აზრით, ეს არა სამართლებრივი, არამედ პოლიტიკური გადაწყვეტილებაა, რომელიც რისკის ქვეშ აყენებს სისტემის ერთიანობას, ტექნიკური პროცედურების დაცვას და სამართლებრივ უსაფრთხოებას. თუ ყველა მოქმედი აქტი ეჭვქვეშ დადგება, ჩვენ ძალიან სახიფათო ტერიტორიაზე აღმოვჩნდებით.

ლა ლიგა, როგორც ესპანურ პროფესიონალურ სპორტზე პასუხისმგებელი ორგანო, გააგრძელებს თავისი უფლებამოსილებების დაცვას“.

ცნობისთვის, რამდენიმე დღის წინ ესპანეთის სპორტულმა სასამართლომ (CSD) დაადასტურა, რომ დანი ოლმო და პაუ ვიქტორი სეზონის ბოლომდე დარეგისტრირებულები დარჩებიან. CSD-მ ასევე განაცხადა, რომ ლა ლიგის მონიტორინგის კომისიას არ აქვს კომპეტენცია ფეხბურთელების რეგისტრაციის გასაუქმებლად.