მოურინიო მკაცრ სასჯელს გადაურჩა - სადისციპლინო კომიტეტის გადაწყვეტილება

თურქეთის თასის მეოთხედფინალში „ფენერბაჰჩე“ – „გალათასარაის“ მატჩის დროს მომხდარი ინციდენტის გამო, ჟოზე მოურინიო 3-მატჩიანი დისკვალიფიკაციით დასაჯეს. „ფენერის“ პორტუგალიელმა დამრიგებელმა თავის ვიზავის ოქან ბურუქს ცხვირში ხელი ისე მიარტყა, რომ ეს უკანასკნელი მოედანზე დაეცა, რასაც მხარეებს შორის სერიოზული შეხლა-შემოხლა მოჰყვა. არბიტრმა კი „განსაკუთრებულს“ წითელი ბარათი უჩვენა.

როგორც თურქეთის ფეხბურთის ფედერაციის სადისციპლინო კომიტეტის მიერ გამოქვეყნებულ დასკვნაში წერია, მათ გაითვალისწინეს ის გარემოება, რომ მოურინიოს საქციელი ბურუქის მიერ იყო პროვოცირებული, რის გამოც შეჯერდნენ იმ აზრზე, რომ „ფენერბაჰჩეს“ თავკაცისთვის სამმატჩიანი დისკვალიფიკაცია სრულიად ადეკვატური სასჯელი იქნებოდა.

სხვათა შორის, მოურინიოს წინააღმდეგ საქმის გამოძიებას „გალათასარაის“ წარმომადგენლები მანამდე სულ სხვა ფაქტის გამო ითხოვდნენ და ისინი ამტკიცებდნენ, რომ პორტუგალიელმა მათი კლუბის რამდენიმე წარმომადგენელს მაიმუნები უწოდა, თუმცა ჟოზეს ეს ყველაფერი ვერ დაუმტკიცეს, მის საქციელში სათანადო ორგანოებმა რასისტული შინაარსის სიტყვები ვერ დაინახეს და საქმის განხილვა შეწყდა.