კახა შენგელია: „კარგი იქნება, თორნიკე ვირტუსიდან თუ წავა“
წლევანდელ სეზონში „ვირტუსმა“ საკალათბურთო ევროლიგაში ნამდვილი ფიასკო განიცადა და არათუ მომდევნო ეტაპზე ვერ გავიდა, არამედ პლეი ოფში მოსახვერად არც უბრძოლია. სეზონის მიმდინარეობისას, ბოლონიურ გუნდში იყო სამწვრთნელო ცვლილებაც და ლუკა ბანკის მაგივრად დუშკო ივანოვიჩი დაინიშნა, თუმცა სიტუაცია არსებითად ვერც ამ უკანასკნელმა შეცვალა.
ბოლონიელების წარუმატებლობაში ყველაზე ნაკლები ბრალი თორნიკე შენგელიას მიუძღვის, რომელიც როგორც ევროტურნირზე, ასევე იტალიის ჩემპიონატში ლამის ყოველ შეხვედრაში თანაგუნდელებს შორის ყველაზე შედეგიანია და ყველანაირად ცდილობს კლუბს დადებითი შედეგის მიღწევაში დაეხმაროს. რით არის განპირობებული „ვირტუსის“ წლევანდელი არასტაბილური გამოსვლა და რას აპირებს ამ სეზონის დასრულების შემდეგ მისი შვილი, ამის თაობაზე Crystalsport-თან ინტერვიუში თოკოს მამამ და წარსულში ცნობილმა კალათბურთელმა კახა შენგელიამ დეტალურად ისაუბრა.
კახა შენგელია
ევროლიგაში „ვირტუსი“ იმდენად ცუდად გამოიყურება, რომ მიჭირს კომენტარის გაკეთება და წარუმატებლობის მიზეზების პოვნა. ალბათ იმის ბრალია, რომ ვისაც არ ეზარება, ყველა ლიდერობას იჩემებს, რაც საერთო ატმოსფეროზე უარყოფითად მოქმედებს.
თორნიკეს სამომავლო გეგმების შესახებ ჯერ ვერაფერს გეტყვით. ვიცი, რომ ბოლონიურ კლუბთან კონტრაქტის ზაფხულში უმთავრდება, თუმცა საკლუბო თემაზე საბოლოო გადაწყვეტილებას ალბათ ევრობასკეტის დასრულების შემდეგ მიიღებს. ჩემი აზრით, კარგი იქნება თუ წავა და სიმართლე გითხრათ, მე თოკოს „ვირტუსის“ დატოვებას შარშანაც ვურჩევდი.
რაც შეეხება ევრობასკეტს, იმდენად კონკურენტუნარიანი გუნდია საქართველოს ნაკრები რომ ნებისმიერ მეტოქესთან დადებითი შედეგის მიღწევაზე ფიქრი შეუძლია. მითუმეტეს, რომ გოგა ბითაძისა და სანდრო მამუკელაშვილის დამატებით სულ სხვა კომპლექტაციის გუნდს მივიღებთ.
თუ შევატყობთ, რომ ესპანეთის ნაკრებს ვერ ვუგებთ, არაა საჭირო ენერგიის ბოლომდე მათთან დახარჯვა და აქცენტი კვიპროსელებთან და ბოსნიელებთან გამარჯვებაზე უნდა გავაკეთოთ. საქართველოს ეროვნული გუნდის პროგრამა-მინიმუმი ჯგუფიდან გასვლა იქნება, მაქსიმუმი კი ნამდვილად აღარ ვიცი.
როგორც უკვე მოგახსენეთ, კახა შენგელია წარსულში ცნობილი კალათბურთელი იყო და საქართველოს ნაკრებში ჩატარებულ 10 მატჩში (148 წუთი) თავი 51 ქულით, 34 მოხსნითა და 7 ჩაჭრით გამოიჩინა.
