„მეგონა კიდევ ერთი წელი დავრჩებოდი“ - მიულერს კონტრაქტი აღარ გაუხანგრძლივეს

მიმდინარე სეზონში ტომას მიულერის თამაშის დონე იმას არ შეესაბამება, რასაც გერმანიის ნაკრების ლეგენდამ მისი და „ბაიერნის“ ერთგული გულშემატკივრები წლების განმავლობაში მიაჩვია. ამის გამო, ბუნებრივია, „რეკორდმაისტერის“ მთავარი მწვრთნელი ვენსან კომპანი 35 წლის შემტევს ნაკლებ სათამაშო დროს აძლევს. სავარაუდოდ, კომპანისვე რეკომენდაციით კი, მიულერთან ამ სეზონის ბოლომდე მოქმედი კონტრაქტი არ გაგრძელდება, რის შემდეგაც ფეხბურთელი იძულებული გახდა სოციალური ქსელის საშუალებით წასვლის შესახებ განცხადება გაეკეთებინა.

„ჩემს ირგვლივ ბოლო პერიოდში აგორებული უამრავი ჭორის საპასუხოდ, მინდა არსებულ ვითარებას ნათელი მოვფინო. ამდენი წლის გასვლისა და უკანასკნელ დროს ჩემი სათამაშო წუთების შემცირების მიუხედავად, თანაგუნდელებთან ერთად ვრჩებოდი და ვცდილობდი მათთვის ტიტულების მოგებაში დახმარება გამეწია და იდეაში ეს ყველაფერი მეგონა, რომ მომდევნო სეზონშიც გაგრძელდებოდა.

თუმცა, კლუბის ხელმძღვანელებმა სრულიად შეგნებულად, კონტრაქტის კიდევ ერთი წლით გახანგრძლივება აღარ შემომთავაზეს. მნიშვნელოვანია, რომ „ბაიერნი“ თავისი პრინციპების ერთგული რჩება და ეს მიუხედავად იმისა, მომწონს თუ არა პირადად მე ყოველივე ეს. ვაფასებ და პატივს ვცემ მათ გადაწყვეტილებას, რისი მიღებაც როგორც დირექტორთა, ასევე სამეთვალყურეო საბჭოს წევრებისთვის საკმაოდ რთული იყო.

ვიცი, რომ ბოლო პერიოდში ჩემი ფიზიკური კონდიციები და თამაშის ხარისხი იდეალურისგან შორს არის, თუმცა ამის კომპენსირებას დაკარგული ბურთების სწრაფ დაბრუნებაზე ზრუნვით ვახდენ. ახლა ჩემთვის ყველაზე მნიშვნელოვანია ბუნდესლიგის ვერცხლის სინი დავიბრუნოთ და ჩემპიონთა ლიგის ფინალში გავიდეთ, რომელსაც ჩვენი მშობლიური მიუნხენი უმასპინძლებს“.

ტომას მიულერმა „ბაიერნთან“ ერთად 12-ჯერ გერმანიის ბუნდესლიგა, 6-ჯერ ქვეყნის თასი, 8-ჯერ გერმანიის სუპერთასი, 2-ჯერ ჩემპიონთა ლიგა, 2-ჯერ ევროპის სუპერთასი და ამდენჯერვე ფიფას მსოფლიოს საკლუბო ჩემპიონატი მოიგო.