მინიმუმ 20 გოლი 15 სეზონში - კრიშტიანუ არ ჩერდება

„ერ-რიადი „ალ-ნასრის“ ფერებში შეიღება“ - ასე ემოციურად გამოეხმაურა კრიშტიანუ რონალდუ საუდის არაბეთის პრო ლიგაში მისი გუნდის გამარჯვებას და პრინციპში, საამისო საფუძველიც ჰქონდა, რადგან მას შემდეგ, რაც ის „ალ-ნასრიში“ გადავიდა, „ალ-ჰილალის“ დამარცხებას 7 მატჩის (5 წაგება, 2 ფრე) განმავლობაში ვერ ახერხებდა და ეს უსიამოვნო ტრადიცია გუშინ დაირღვა, როდესაც 40 წლის პორტუგალიელმა ვარსკვლავმა და მისმა თანაგუნდელებმა უშუალო კონკურენტს 3:1 მოუგეს.

რონალდუმ დუბლი შეასრულა, ერთი გოლი თამაშიდან გაიტანა, ერთი კი 11-მეტრიანის ნიშნულიდან, რის შემდეგაც მიმდინარე პრო ლიგაში 21 ბურთი დაუგროვდა და ბომბარდირთა დავას სათავეში ჩაუდგა. კრიშტიანუს კარიერაში ეს რიგით მეთხუთმეტე სეზონია, როდესაც ამა თუ იმ ქვეყნის პირველობაზე მინიმუმ 20-ჯერ შეძლო თავის გამოჩენა. წლევანდელ სეზონში „ალ-ნასრის“ რიგებში ყველა ტურნირზე ჩატარებულ 33 მატჩში კი მან 28 გოლი და 4 საგოლე გადაცემა მიითვალა. რახან პენალტი ვახსენეთ, გეტყვით, რომ პორტუგალიელს კარიერაში შესრულებული 11-მეტრიანების 85 პროცენტი (206-დან 174) აქვს რეალიზებული. მისმა მარადიულმა კონკურენტმა ლიონელ მესიმ კი 140 უმაღლესი საფეხბურთო სასჯელიდან გოლად 109 აქცია.

ცნობისათვის, 1000 ბურთის გატანის დიდი სურვილის მქონე კრიშტიანუ რონალდუს ანგარიშზე ამ ეტაპზე 931 გოლია, საიდანაც 795 - საკლუბო, ხოლო 136 სანაკრებო დონეზე გაიტანა.