ანჩელოტის ვარიანტის ჩაშლის შემთხვევაში - ბრაზილიაში მანჩინი წავა

„ვალენსიასთან“ მატჩის წინ გუშინ გამართული პრესკონფერენცია „რეალის“ იტალიელმა მთავარმა მწვრთნელმა საინტერესოდ დაასრულა. კარლო ანჩელოტიმ განაცხადა, რომ არასოდეს გამოუთქვამს სამეფო კლუბის დატოვების სურვილი და თუ ხელმძღვანელების ნება იქნება, კონტრაქტს სიამოვნებით გაახანგრძლივებს. მსგავსი მოცემულობა კარლიტოს ბრაზილიის ნაკრების დამრიგებლად დანიშვნას პრაქტიკულად გამორიცხავს, რის გამოც სამხრეთ ამერიკელებმა ალტერნატიული ვარიანტი უნდა ეძებონ.

Goal.com-ის ცნობით კი, ბრაზილიის საფეხბურთო კონფედერაციის შეფებს სხვადასხვა მენეჯერებმა რობერტო მანჩინის კანდიდატურა შესთავაზეს, რომელიც საუდის არაბეთიდან წამოსვლის შემდეგ უმუშევარია და მისი კვალიფიკაცია რომ არანაირ ეჭვებს არ იწვევს, ამაზე სამწვრთნელო კარიერაში აპენინელის მიერ მიღწეული შედეგებიც კარგად მეტყველებს. როგორც ირკვევა, მხარეებს მოლაპარაკებები უკვე დაწყებული აქვთ და შესაძლოა იტალიელმა სპეციალისტმა სელესაოს უკვე ივნისში გასამართ მსოფლიოს ჩემპიონატის შესარჩევ მატჩებში უხელმძღვანელოს.

საკლუბო დონეზე მანჩინის ტიტულების ჩამოთვლა შორს წაგიყვანს, სანაკრებო ფეხბურთში კი ყველაზე დიდ წარმატებას ევრო 2020-ზე მიაღწია, როდესაც იტალიის ნაკრებს ჩემპიონის წოდება მოუტანა.