„კონორთან ჩასული დამაკავეს“ - ჩიმაევის სახალისო ისტორია
მიუხედავად იმისა, რომ სამივე რუსეთის სახელით ჩხუბობს, UFC-ის საშუალო წონითი დივიზიონის დაუმარცხებელ ჩეჩენ მებრძოლს ხამზატ ჩიმაევს დაღესტნელებთან, ხაბიბ ნურმაგომედოვთან და ისლამ მახაჩევთან მეგობრული ურთიერთობა ნამდვილად არ აკავშირებს. მეტსაც გეტყვით, რამდენიმე წლის წინ, ჩიმაევი ირლანდიაში იყო ჩასული, რათა ხაბიბის ყველაზე პრინციპულ მეტოქესთან, კონორ მაკგრეგორთან სპარინგები გაემართა, თუმცა არაფერი გამოუვიდა და თუ რატომ, ამასთან დაკავშირებით შემდეგი კომენტარი გააკეთა:
„ხაბიბთან ბრძოლამდე რამდენიმე თვით ადრე ირლანდიაში ჩავედი, რათა მაკგრეგორთან მევარჯიშა, მაგრამ ვერ ვიპოვე. მაშინ ინტერნეტში ვნახე ჩემი ჩეჩენი მეგობრის მიერ დადებული ფოტო, სადაც ის კონორთან სპარინგობდა და მეც მომინდა იგივეს გაკეთება.
პრინციპში, ის დიდხანს არც მიძებნია, რადგან აეროპოტში ჩასვლისთანავე დამაკავეს და უკან, სახლში გამომიშვეს. ეს უბრალოდ გაუგებრობა გახლდათ, რაზეც ის ფაქტიც მეტყველებს, რომ მოგვიანებით დიდი ბრიტანეთის შესაბამისმა ორგანოებმა წერილი მომწერეს, სადაც ისინი მატყობინებდნენ, რომ მათთან ჩასვლა ნებისმიერ დროს შემეძლო“.
შეგახსენებთ, რომ ხამზატ ჩიმაევი სატიტულო ბრძოლის ჩანიშვნის მოლოდინშია და საჩემპიონო ქამრის ჩამორთმევას ის სამხრეთ აფრიკელი დრიკუს დუ პლესისთვის შეეცდება.
