„ეს უნდა გადავლახოთ“ - კომპანი მუსიალას ტრავმაზე

უმნიშვნელოვანესი, სეზონის გადამწყვეტი მატჩების წინ „ბაიერნმა“ წამყვანი ფეხბურთელი დაკარგა - ჯამალ მუსიალამ „აუგსბურგთან“ გამართულ გერმანიის ბუნდესლიგის XXX ტურში ბარძაყის უკანა კუნთი დაიზიანა, რის გამოც რამდენ ხანს მოუწევს მკურნალობა, ჯერჯერობით ცნობილი არ არის. თუმცა, როგორც „რეკორდმაისტერის“ სპორტულმა დირექტორმა მაქს ებერლიმ აღნიშნა, ახალგაზრდა შემტევის 8 აპრილს „ინტერთან“ გასამართ ჩემპიონთა ლიგის მეოთხედფინალის პირველ რაუნდში მოედანზე გამოჩენა გამორიცხულია, დანარჩენს კი დეტალური სამედიცინო გამოკვლევა დაადგენს.

„ბაიერნის“ მთავარი მწვრთნელი ვენსან კომპანი თამაშის დასრულების შემდეგ ბუნებრივია დამწუხრებული იყო და ხაზს უსვამდა იმ ფაქტს, რომ მუსიალას დაშავება მისი გუნდისთვის აუნაზღაურებელი დანაკლისი იქნება, თუმცა იქვე დაამატა, რომ მის განკარგულებაშია დიდი გამოცდილების მქონე ტომას მიულერი, რომელიც ჩემპიონთა ლიგაში მუდამ უმაღლეს დონეზე ასპარეზობს და „ინტერთან“ მისი დიდი იმედი ექნება.

რამდენად დიდი ძალაა მიუნხენური გრანდისთვის მუსიალა, ამაზე სტატისტიკაც კარგად მეტყველებს - მიმდინარე სეზონში ყველა ტურნირზე გამართულ 37 შეხვედრაში მან თავი 15 გოლით გამოიჩინა. მთლიანობაში გერმანიის ჩემპიონატში 22 წლის ჯამალის ანგარიშზე უკვე 45 ბურთია და მის ასაკში ამაზე შედეგიანი ბუნდესლიგაში მხოლოდ ორი ფეხბურთელი, გერდ მიულერი (79) და ული ჰიონესი (59) იყო.