ჯორდანზე წინ - გილჯეს-ალექსანდერის მორიგი რეკორდი

წლევანდელ სეზონში „ოკლაჰომას“ წარმატებული გამოსვლის მთავარი შემოქმედი შეი გილჯეს-ალექსანდერია, რომელიც მიმდინარე NBA-ში საშუალოდ 32,6 ქულას, 5 მოხსნასა და 6,4 შედეგიან გადაცემას აგროვებს, რის გამოც „დენვერის“ ლიდერ ნიკოლა იოკიჩთან ერთად, რეგულარული ეტაპის MVP-ის პრიზის მოგების ერთ-ერთი რეალური პრეტენდენტია.

მისი კალიბრის მოთამაშიდან გამომდინარე, თბილისის დროით დღეს დილით „ჰიუსტონთან“ (111:125) წაგებულ შეხვედრაში კანადელს განსაკუთრებული შედეგიანობით არ გამოიჩენია თავი და 35 წუთში 22 ქულასთან ერთად, 4 მოხსნა და 8 ასისტი დააგროვა, თუმცა ერთი უნიკალური რეკორდის ავტორი მაინც გახდა. მან წლევანდელ სეზონში მინიმუმ 20 ქულა ზედიზედ 70 მატჩში დააგროვა, რითაც 1990-1991 წლებში მაიკლ ჯორდანის (69) რეკორდი გააუმჯობესა. აქვე გეტყვით, რომ 20-ზე ნაკლები ქულა გილჯეს-ალექსანდერმა წელს მხოლოდ ერთ შეხვედრაში მიითვალა, როდესაც „სან ანტონიოსთან“ 18 ქულას დასჯერდა.

ცნობისათვის, ამ მხრივ ჯორდანზე და გილჯეს-ალექსანდერზე წინ უილტ ჩემბერლენი და ოსკარ რობერტსონი დგანან. პირველმა მათგანმა მინიმუმ 20 ქულას თავი ზედიზედ 80 მატჩში ორჯერ, 1962 და 1964 წლებში მოუყარა, რობერტოსნმა კი ასევე 1964 წელს, მინიმუმ 20-ქულიანი მაჩვენებლით  76 თამაში ჩაატარა