იტალიური დერბი ევროლიგაში - შენგელიას 14 ქულა

საკალათბურთო ევროლიგის რეგულარული ეტაპის ბოლოსწინა ტურში იტალიური დერბი შედგა - ბოლონიაში გამართული სერია A-ს ვიცე-ჩემპიონ „ვირტუსსა“ და ჩემპიონ „ოლიმპია მილანოს“ დაპირისპირება მასპინძლებმა 90:70 მოიგეს.

თორნიკე შენგელიამ პარკეტზე 19 წუთი გაატარა და „ვირტუსს“ გამარჯვებაში 14 ქულით, 4 მოხსნით, 3 ასისტითა და 1 დაფარებით დაეხმარა. თოკომ სამიდან ერთი სამქულიანი ჩააგდო, შვიდიდან ოთხი ორქულიანი გამოიყენა და საჯარიმოები 100-პროცენტიანი (სამიდან სამი) სიზუსტით ისროლა. ოთხივე მოხსნა დაცვაში შეასრულა, ბურთი მხოლოდ ერთხელ დაკარგა და სამი პერსონალური ჯარიმა მიიღო.

9 მოგებითა და 24 წაგებით ევროლიგის სატურნირო ცხრილში ბოლონიური კლუბი ბოლოსწინა ადგილზეა. მომდევნო შეხვედრას თორნიკე შენგელია და მისი თანაგუნდელები იტალიის ჩემპიონატში სტუმრად „ტრევიზოსთან“ გამართავენ, რომელიც 7 აპრილს, თბილისის დროით, 22:00 საათზე დაიწყება.