დასრულების დროა - ჰუმელსმა წასვლა გადაწყვიტა
გერმანული ფეხბურთის ლეგენდამ მატს ჰუმელსმა კარიერის დასრულება გადაწყვიტა. 36 წლის ცენტრალური მცველის განცხადებით, წლევანდელი სეზონი მისთვის უკანასკნელი იქნება და ივნისში სპორტის უპირველეს სახეობას ოფიციალურად დაემშვიდობება. ამჟამად ჰუმელსი „რომას“ ღირსებას იცავს, იქამდე კი „ბაიერნისა“ და „დორტმუნდის“ შემადგენლობაში ასპარეზობდა.
მისი კარიერის ყველაზე დიდი მიღწევა სანაკრებო ფეხბურთს უკავშირდება - 2014 წელს გერმანიის ნაკრებთან ერთად მსოფლიოს ჩემპიონი გახდა და გუნდის წარმატებაში საკმაოდ დიდი წვლილი შეიტანა. რაც შეეხება საკლუბო კარიერას, გერმანიის ბუნდესლიგა სამჯერ „რეკორდმაისტერში“, ორჯერ კი „ბორუსიაში“ გამოსვლისას მოიპოვა, სამჯერ გახდა ქვეყნის თასის, ხუთჯერ კი სუპერთასის გამარჯვებული.
ჰუმელსი ინდივიდუალური მიღწევებითაც განებივრებული იყო - ის რვაჯერ გერმანიის ბუნდესლიგის, თითოჯერ კი მუნდიალის, ჩემპიონთა ლიგისა და ევროპა ლიგის სიმბოლურ ნაკრებში მოხვდა.
