„არ უნდა ბრძოლა და ჩამოართვან ტიტული“ - ასკრენმა მახაჩევს შეუტია

მსუბუქ წონით დივიზიონში ისლამ მახაჩევსა და ილია თოფურიას შორის შესაძლო დაპირისპირებაზე აზრს უამრავი ყოფილი თუ მოქმედი მებრძოლი გამოთქვამს. ნაწილი მათგანი მიიჩნევს, რომ ისლამს სრული უფლება აქვს ილიასთან დაპირისპირებაზე უარი თქვას, თუმცა არსებობენ ისეთებიც, რომლებიც თოფურიას პრეტენზიებს სრულიად საფუძვლიანად თვლიან და ამ ბრძოლის ჩანიშვნასთან მიმდინარე მოლაპარაკებების დროს, შერეული ორთაბრძოლების ყველაზე პრესტიჟული ორგანიზაციის აღმასრულებელ დირექტორს, დენა უაითს მახაჩევის მიმართ მეტი სიხისტის გამოჩენისკენ მოუწოდებენ. სწორედ მათ რიგებს მიეკუთვნება UFC-ის ყოფილი მებრძოლი ბენ ასკრენი, რომელმაც საკმაოდ საინტერესო კომენტარი გააკეთა.

რას ამბობს ასკრენი

როგორ უნდა მოიქცეს უაითი? ის უბრალოდ უნდა მივიდეს მახაჩევთან და უთხრას: „თუ შენ ეს ბრძოლა არ გსურს, მაშინ ტიტულს დაემშვიდობები“. დენამ ეს ერთხელ უკვე გააკეთა და თუ მოინდომებს, ახლაც არ გაუჭირდება. ცუდს არაფერს ვამბობ - თუ ჩემპიონი ხარ, ქამარს საუკეთესოებთან უნდა იცავდე.

ილია თოფურიამ UFC-ის ორი ლეგენდა დაამარცხა და არამხოლოდ დაამარცხა, არამედ ისინი დააფინიშა. არ არის საჭირო დიდი გონება იმის მისახვედრად, რომ ქართველი ამჟამად მსუბუქ დივიზიონში სიძლიერით მეორეა, მახაჩევი - პირველზეა და ამჟამად გულშემატკივარს სწორედ მათი დაპირისპირების ხილვა სურს. მოკლედ, ჩემი აზრი ასეთია - თუ ისლამი ბრძოლაზე უარს იტყვის, ჯოჯოხეთი გარანტირებული აქვს.

ცნობისათვის, დღეს გავრცელდა ინფორმაცია, რომ ისლამ მახაჩევი თავის მომდევნო ბრძოლასთან დაკავშირებით გადაწყვეტილებას ნახევრადსაშუალო წონითი დივიზიონის საჩემპიონო შეხვედრის შემდეგ მიიღებს, სადაც მისი მეგობარი ბელალ მუჰამადი ჯეკ დე ლა მადალენას დაუპირისპირდება.