5-გოლიანი შეხვედრა | საქართველოს ქალთა ნაკრები მალტასთან დამარცხდა

საქართველოს ქალთა ეროვნულმა ნაკრებმა, ერთა ლიგის მესამე ტურში, მალტას უმასპინძლა. ირის ანტმანის გუნდმა მიხეილ მესხის სათადარიგო სტადიონზე იასპარეზა და მეტოქესთან 2:3 დამარცხდა.

შეხვედრის პირველი გოლი 27-ე წუთზე გავიდა. ჰეილი ბუჯეიას ჩაწოდების შემდეგ, მარია ფარუჯამ მეორე სართულზე ყველას აჯობა და ანგარიში გახსნა. 3 წუთში, მალტელთა უპირატესობა ორბურთიანი გახდა. თათია გაბუნიას კარი ამჯერად ბუჯეიამ აიღო.

პირველი ტაიმის მიწურულს, ფარუჯამ დუბლი გაიფორმა და მალტამ საწყისი ნახევარი 3:0 მოიგო. მეორე ტაიმში, საქართველოს ნაკრების ორი გოლი გაიტანა. 59-ე წუთზე, ტატიანა მატვეევას გადაცემით თეონა ბაქრაძემ ისარგებლა, ხოლო მსაჯის მიერ კომპენსირებულ ბოლო წუთზე, მალტის ნაკრების კარში დანიშნული პენალტი ნათია დანელიამ გამოიყენა.

2025 წლის ერთა ლიგის C ლიგის გათამაშებაში, საქართველოს ნაკრები მეორე ჯგუფში ასპარეზობს, სადაც მისი მეტოქეები ანდორა, მალტა და კვიპროსი არიან. C ლიგა ექვსი ჯგუფისგან შედგება და B ლიგის საგზურს ჯგუფების გამარჯვებულები მოიპოვებენ. დაწინაურების დამატებით შანსს მიიღებს ორი საუკეთესო მეორეადგილოსანი, რომლებიც პლეი-ოფში B ლიგის მესამეადგილოსნებს დაუპირისპირდებიან. სამი ტურის შემდეგ, საქართველოს ნაკრების აქტივში 3 ქულაა.