სიმეონე სიკვდილამდე ათამაშებს - გრიზმანს ესპანეთში აკრიტიკებენ

ანტუან გრიზმანმა წლევანდელი სეზონი ისე დაიწყო, ძნელად თუ ვინმე წარმოიდგენდა რომ ახლა სერიოზული კრიტიკის ობიექტი იქნებოდა. 44 შეხვედრაში 34 წლის ფრანგი შემტევის ანგარიშზე 16 გოლი და 7 ასისტია, თუმცა უკანასკნელ 12 მატჩში თავი მხოლოდ 1 ბურთითა და 1 საგოლე პასით გამოიჩინა, რაც რბილად რომ ვთქვათ, მის არასახარბიელო ფორმაში ყოფნაზე მეტყველებს.

ავტორიტეტული ესპანური გამოცემა El Chiringuito-ს ჟურნალისტი ხოსე დამიანი ერთ-ერთ გადაცემაში სწორედ გრიზმანის თემას შეეხო და ვეტერანი ფეხბურთელი საკმაოდ მწვავედ გააკრიტიკა. მეტიც, დამიანმა მისი ამჟამინდელი ფორმიდან გამომდინარე, ანტუანი არა მოქმედ, არამედ ყოფილ ფეხბურთელს შეადარა:

„ანტუანი მოედანზე ისე გამოიყურება, თითქოს ვეტერანი მოთამაშე იყოს და რომელიმე კოლეგის მიერ ორგანიზებულ საქველმოქმედო მატჩში ასპარეზობდეს. უკვე ორი თვეა ესპანეთის ლა ლიგაში გოლის გატანას ვერ ახერხებს, არადა მეკარე იან ობლაკთან ერთად, მოედანზე ყველაზე მეტ დროს ატარებს. მგონი, დიეგო სიმეონეს სურს ანტუანი მისი ხელმძღვანელობით სიკვდილამდე ვარჯიშობდეს და თამაშობდეს, თორემ აქამდე აუცილებლად შეამჩნევდი, რომ ის არაფერს აღარ აკეთებს“.

ცნობისათვის, ანტუან გრიზმანმა „ატლეტიკოს“ შემადგენლობაში თითოჯერ ესპანეთის სუპერ თასი (2014), უეფას სუპერ თასი (2018) და ევროპა ლიგა (2018) მოიგო.