ზედიზედ მესამედ - გველესიანი ირანში საუკეთესო მცველად აღიარეს
თეირანის „პერსეპოლისში“ მოთამაშე ქართველი მცველი, გიორგი გველესიანი წლის საუკეთესო მცველად აღიარეს.
ქართველმა ფეხბურთელმა „პერსეპოლისის“ მიმდინარე სეზონი შეაფასა და საქართველოს ნაკრებზეც ისაუბრა.
„ამაყი ვარ, რომ საუკეთესო მცველად მაღიარეს. სახლში ორი ასეთი ჯილდო მაქვს, ეს მესამე იქნება. უკვე 8 წელია, ირანში ვთამაშობ, და ვცდილობ, ჩემი მაქსიმუმი ვაჩვენო. მიხარია, რომ ხალხი აფასებს ამას. მადლობას ვუხდი ყველას.
ბოლო ორი სეზონი ჩვენთვის წარმატებული გამოდგა - ჩემპიონები გავხდით, მაგრამ წელს უფრო რთულად მიდის საქმე. მე ყოველთვის თვითკრიტიკული ვარ და ვამბობ, რომ უკეთ უნდა ვითამაშო, თუმცა მიხარია, რომ ხალხი ჩემს თამაშს დადებითად აფასებს.
გასულ სეზონში ჩემი გოლით გავხდით ჩემპიონები - ეს წარმოუდგენელი გრძნობა იყო, რომელსაც არასოდეს დავივიწყებ. ამის შემდეგ და შესაძლოა სწორედ ამის გამოც, გამომიძახეს საქართველოს ნაკრებში და ევროპის ჩემპიონატზე ვითამაშე. ალბათ, ეს ჩემი კარიერის საუკეთესო ეპიზოდად დარჩება.
ახლა რთული მომენტია „პერსეპოლისთვის“, რამდენიმექულიანი ჩამორჩენა გვაქვს აღმოსაფხვრელი. მაქსიმუმს გავიღებთ, რათა ჩემპიონები გავხდეთ, მაგრამ ეს რთული იქნება. ჩემი მიზანია, ყველა მატჩი კარგად ჩავატარო. ვნახოთ, რა მოხდება შემდეგ: მსოფლიო ჩემპიონატის საკვალიფიკაციო ეტაპი იწყება და იმედი მაქვს, რომ 2026 წელს საქართველოს ნაკრებთან ერთად მსოფლიო ჩემპიონატზე ვითამაშებ“.
ცნობისთვის, გველესიანი „პერსეპოლისის“ ღირსებას 2022 წლიდან იცავს, მანამდე კი ჯერ „ზობ აჰანში“, შემდეგ კი „ნასაჯისა“ და „სეპაჰანში“ თამაშობდა.
