ვერდიქტი ცნობილია | რა გადაწყვეტილება მიიღო უეფა-მ რეალის ფეხბურთელთა საქმეზე

ჩემპიონთა ლიგის მერვედფინალში, „რეალი“ „ატლეტიკოს“ დაუპირისპირდა. „სამეფო კლუბმა“ პენალტების სერიაში გაიმარჯვა და „ბლანკოსის“ ფეხბურთელებმა წარმატება ემოციურად აღნიშნეს და ბევრის აზრით, შეურაცხმყოფელი ჟესტები გამოიყენეს, რაზეც უეფა-მ გამოძიება დაიწყო.

ევროპული ფეხბურთის მმართველი ორგანოს ყურადღების ცენტრში ოთხი მოთამაშე იყო მოქცეული: ანტონიო რუდიგერი, კილიან მბაპე, დანი სებალიოსი და ვინისიუს ჟუნიორი. განსახილველი საკითხი მათ მიერ, გამარჯვების აღნიშვნისას გამოყენებული ჟესტები და შესაძლო დისკვალიფიკაცია იყო.

Marca-ს ინფორმაციით, „რეალის“ ფეხბურთელები დისკვალიფიკაციას არ მიიღებენ. რუდიგერსა და მბაპეს გამოსაცდელი ვადა დაუწესდათ და თუ მომდევნო ერთი წლის განმავლობაში, მსგავს ქმედებას გაიმეორებენ, ერთმატჩიანი დისკვალიფიკაციით დაისჯებიან. ასევე, მათ 30 000 და 40 000 ევროს ოდენობის ჯარიმები უნდა გადაიხადონ.

დისკვალიფიკაციას გადაურჩა სებალიოსიც და მასაც ფინანსური ჯარიმა დაეკისრა - 20 000 ევრო. ვინისიუს ჟუნიორს არანაირი სასჯელი არ მიუღია. ასე რომ, „რეალი“ ჩემპიონთა ლიგის მეოთხედფინალურ დაპირისპირებას, რომელსაც „არსენალის“ წინააღმდეგ გამართავს, ყოველგვარი დანაკლისის გარეშე ხვდება.