რიგგარეშე საერთო კრება ჩანიშნულია - რაგბის კავშირის საპრეზიდენტო არჩევნები
საქართველოს რაგბის კავშირის გამგეობის მოწვევით, 2025 წლის 26 აპრილს, სასტუმრო Hilton Garden Inn Tbilisi-ში რიგგარეშე საერთო კრება გაიმართება, სადაც მთავარი საკითხი პრეზიდენტის არჩევა იქნება. პრეზიდენტობის კანდიდატების წარდგენის ვადა 16 აპრილს, 15:00 საათზე იწურება.
საერთო კრებაზე დასწრების უფლება ექნება ნამდვილი წევრის (დელეგატის) ერთ უფლებამოსილ პირს ან უფლებამოსილი პირის წარმომადგენელს, რომელმაც თან უნდა იქონიოს სანოტარო წესით სათანადოდ დამოწმებული მინდობილობა. პრეზიდენტის არჩევის გარდა, სხდომაზე წარდგენილი იქნება გამგეობის შემადგენლობა, რომელსაც ასევე კენჭს უყრიან. კლუბებს, რომლებსაც შესაძლოა პრეტენზია გაუჩნდეთ გამგეობის მიერ დამტკიცებულ ნამდვილ წევრთა სიასთან, ან ხმათა რაოდენობასთან დაკავშირებით, 28 მარტს მიღებული დადგენილების გასაჩივრება 11 აპრილამდე შეეძლებათ.
შეგახსენებთ, რომ საქართველოს რაგბის კავშირს უკანასკნელი ოთხი წლის განმავლობაში იოსებ ტყემალაძე ხელმძღვანელობდა და მისი პრეზიდენტობის პერიოდში საქართველოს მორაგბეთა ნაკრებმა ტიერ 1-ის ორი წარმომადგენელი, იტალიისა და უელსის ეროვნული გუნდი დაამარცხა.
