„საკუთარ მოედანზე ჩემპიონატის მოგება შესანიშნავი იქნებოდა“ - ენრიკე

„ანჟერთან“ მატჩის წინ „პარი სენ-ჟერმენის“ მთავარმა მწვრთნელმა, ლუის ენრიკემ პრესკონფერენცია გამართა და ჟურნალისტების კითხვებს უპასუხა.

ესპანელი სპეციალისტის თქმით, მისმა გუნდმა შეიძლება ჩემპიონობა უახლოეს ტურში იზეიმოს, თუმცა პარიზელები შეეცდებიან, სეზონი წაუგებლად დაასრულონ.

ლუის ენრიკე:

„გავიმეორებ იმას, რაც წინა კვირებში ვთქვი: ვირტუალურად უკვე ჩემპიონები ვართ, მაგრამ ჩემპიონატი ხვალ არ დასრულდება. არის რამდენიმე რეკორდი, რომელთა მიღწევაც შეგვიძლია.

წაუგებელი სეზონი? დღემდე ეს რეკორდები არ მაინტერესებდა, ახლა კი ამაზეც უნდა ვიფიქროთ - ეს დაგვეხმარება, რომ უკეთ მოვემზადოთ სხვა მატჩებისთვის.

რა თქმა უნდა, გვსურს, ჩემპიონობა საკუთარი გულშემატკივრების წინაშე ვიზეიმოთ. საკუთარ მოედანზე ლიგა 1-ის მოგება დიდი მოტივაციაა - ეს განსაკუთრებული მომენტი იქნება.

ყოველთვის ოპტიმისტურად ვარ განწყობილი, რაღაცის გაუმჯობესება ყოველთვის შეიძლება - როგორც ინდივიდუალურ, ისე კოლექტიურ დონეზე. სპორტის გუნდურ სახეობებში ოპტიმალურ დონეზე გასვლა ძალიან რთულია. როდესაც სეზონისთვის ემზადები, ასევე მზად უნდა იყო იმისთვის, რომ შეცვლილ გარემოებებში აღმოჩნდები. როტაციის გამო მაკრიტიკებდნენ, თუმცა ამ მიდგომამ გაამართლა.

თასის ფინალში გასვლა ძალიან მნიშვნელოვანია. ეს მიზანი სეზონის დასაწყისშივე დავისახეთ. „სტად დე ფრანსზე“ თამაში შესანიშნავი იქნება. ძალიან გვიხარია, რომ ფინალში ვართ.

მსოფლიოს საკლუბო ჩემპიონატს საინტერესო ფორმატი აქვს, გულშემატკივრებს ეს მოეწონება. ამ ტურნირზე მსოფლიოს საუკეთესო გუნდი გამოვლინდება. ჯერ ამაზე ფიქრის დრო არაა, ხვალ „ანჟერთან“ მატჩი გველის.

დემბელეზე ძალიან ბევრჯერ მისაუბრია. შარშან ვამბობდი, რომ ის შთამბეჭდავად თამაშობდა, თუმცა მას ამჟამინდელი სტატისტიკა არ ჰქონია. მისი თამაშის ნახვაში ნებისმიერი გულშემატკივარი გადაიხდის ფულს. ორივე ფეხით ურტყამს, აქვს შეუდარებელი დრიბლინგი - მისი ცუდი მატჩი არ მახსენდება“.

ცნობისთვის, ხვიჩა კვარაცხელიას „პარი სენ-ჟერმენი“ „ანჟერს“ ხვალ, თბილისის დროით 19:00 საათზე დაუპირისპირდება. პარიზელებს ჩემპიონობის მოპოვება შეუძლიათ და ამისთვის მათ ფრეც დააკმაყოფილებთ.