„დიდი თევზი პატარას ყლაპავს“ | ლევანტეს თავკაცი ქოჩორას ტრანსფერზე

„ლევანტეს“ მთავარმა მწვრთნელმა, ხულიან კალერომ გიორგი ქოჩორაშვილის ტრანსფერზე ისაუბრა. „ქოჩო“ „სპორტინგმა“ შეიძინა და ქართველი ფეხბურთელი პორტუგალიურ გრანდს მიმდინარე სეზონის დასრულების შემდეგ შეუერთდება, რასაც ესპანელი სპეციალისტი მატჩისწინა პრესკონფერენციაზე გამოეხმაურა.

„გიორგი ქოჩორაშვილის გარშემო შექმნილ ვითარებასთან დაკავშირებით, ინფორმაცია მქონდა. მთავარმა მწვრთნელმა ყველაფერი უნდა იცოდეს. როგორც ლევანტეს თავკაცს, მინდა, ყველა ჩემი ფეხბურთელი გუნდში დარჩეს, მაგრამ ასე არ ხდება, რადგან დიდი თევზი პატარა თევზს ყლაპავს.

გიორგი შესანიშნავი ბიჭია. ბოლომდე თავდადებულია და სურს, სეზონის დასკვნით ნაწილამდე ჩვენთან იყოს. მას პირადად გავესაუბრე, რათა გამეგო, ფსიქოლოგიურად თავს როგორ გრძნობდა. ჩემი სურვილია, ჩვენი მიზნებისთვის ბრძოლაში ბოლომდე იყოს ჩართული და დარწმუნებული ვარ, ასე იქნება“.

ცნობისთვის, ქოჩორაშვილი „სპორტინგთან“ 2030 წლის ზაფხულამდე გათვლილ ხელშეკრულებს გააფორმებს და მის კონტრაქტში, გამოსასყიდ თანხად 80 მილიონი ევრო ჩაიწერება. „სპორტინგმა“ „ლევანტეს“ 5.5 მილიონი ევრო გადაუხადა და ბონუსებით, შესაძლოა, თანხა კიდევ 2 მილიონით გაიზარდოს.