ბუდუ ტრავმირებულია | „შესაძლოა, მოედანზე რამდენიმე კვირაში ვიხილოთ“
„ჰაიდენჰაიმის“ მთავარმა მწვრთნელმა, ფრანკ შმიდტმა „ლევერკუზენთან“ მატჩის წინ პრესკონფერენცია გამართა და ჟურნალისტების კითხვებს უპასუხა. შმიდტის განცხადებით, „ჰაიდენჰაიმის“ ქართველი ფორვარდი ბუდუ ზივზივაძე ტრავმირებულია და გუნდს უახლოეს მატჩებში ვერ დაეხმარება.
რა თქვა შმიდტმა:
„მათიას ჰონსაკი და ბუდუ ზივზივაძე ტრავმების გამო ვერ დაგვეხმარებიან. ბოლო მატჩებში, მათ შორის „ვოლფსბურგის“ წინააღმდეგ ზივზივაძემ შესანიშნავად ითამაშა. ჩვენთვის და მისთვის სამწუხაროდ, ბუდუ ტრავმირებულია, ფეხბურთში ასე ხდება.
გუშინ ფიზმომზადების მწვრთნელთან ერთად ვარჯიშობდა, პოზიტიურად იყო განწყობილი - ახლა ეს ყველაზე მნიშვნელოვანია. ბუდუ ყველაფერს აკეთებს, რათა რაც შეიძლება სწრაფად დაბრუნდეს.
საქმე გვაქვს გვერდითი იოგის ტრავმასთან, ასეთ დროს კი ყველაზე მნიშვნელოვანია, რომ ფეხბურთელს დისკომფორტი არ ჰქონდეს. შესაძლოა, ბუდუ რამდენიმე კვირაში კვლავ მოედანზე ვიხილოთ.
სამწუხაროა, რომ ახლა დაშავდა, ვინაიდან მასსა და მარვინ პირინგერს შორის ურთიერთგაგება გაჩნდა, თუმცა ჩვენ შევეცდებით, ბუდუს ალტერნატივა მოვუძებნოთ“.
ცნობისთვის, ბუდუ ზივზივაძე „ჰაიდენჰაიმში“ მიმდინარე წლის იანვარში „კარლსრუედან“ გადავიდა. ბუნდესლიგაში ქართველი ფორვარდის ანგარიშზე 12 მატჩში 2 გოლი და 2 საგოლე პასია.
