მიქაუტაძის საიუბილეო მატჩი - ქართველის განსაკუთრებული შეხვედრა ლილთან

ხვალ, საფრანგეთის საფეხბურთო ჩემპიონატის XXVIII ტურში „ლიონი“ საკუთარ სტადიონზე „ლილს“ უმასპინძლებს და ეს შეხვედრა გიორგი მიქაუტაძისთვის განსაკუთრებული იქნება, რადგან 24 წლის ქართველი ფორვარდი ლიგა 1-ში კარიერაში საიუბილეო, 50-ე მატჩს ჩაატარებს. გასული 49 თამაშიდან 22 შემთხვევაში მიქაუტაძე „მეცის“, 27 მატჩში კი „ლიონის“ ღირსებას იცავდა.

აღსანიშნავია ის ფაქტი, რომ მიმდინარე სეზონის საწყის პერიოდში, პიერ საჟის მწვრთნელობის დროს, მიქაუტაძეს თავის გამოჩენის შესაძლებლობა შედარებით ნაკლებად ეძლეოდა, თუმცა ეს ყოველივე მის შედეგიან ასპარეზობაზე უარყოფითად არ ასახულა. სასტარტოში მოხვედრილმა გიორგიმ მოედანზე წლევანდელ ლიგა 1-ში მოედანზე 789 წუთი გაატარა და თავი 6 გოლით გამოიჩინა. ცვლილებაზე შესული ქართველი ფორვარდის ანგარიშზე კი 314 წუთში 2 გოლი და 4 საგოლე გადაცემაა.

ცნობისათვის, 27 ტურში დაგროვებული 45 ქულით „ლიონი“ საფრანგეთის ჩემპიონატის სატურნირო ცხრილში მე-7 ადგილზეა და მე-5 პოზიციაზე მყოფ „ლილს“, რომელსაც ხვალ უმასპინძლებს, მხოლოდ 2 ქულით ჩამორჩება.