„ილიას მახაჩევის დაფინიშება შეუძლია“ | ხორხე კლიმენტმა ძმებ თოფურიებზე ისაუბრა

ილია თოფურიასა და ალექსანდრე თოფურიას მწვრთნელმა, ხორხე კლიმენტმა ქართველი მებრძოლების მომავალზე ისაუბრა. კლიმენტმა ინტერვიუ ალვარო კოლმენეროს მისცა და საინტერესო განცხადებები გააკეთა.

„ილია თოფურიას აქვს თავდაჯერებულობა, რომლითაც სხვა არც ერთი მებრძოლი არ გამოირჩევა. ეს ფაქტორი მას ძალას მისცემს, რომ ნებისმიერ წონაში, ნებისმიერ მეტოქეს ეჩხუბოს. ვფიქრობ, UFC-ის ბევრ ეგოსთან უწევს გამკლავება. ყველა მებრძოლს უნდა, საკუთარი რეიტინგი და პოზიცია დაიცვას, მაგრამ საბოლოო გადაწყვეტილებას პრომოუტერები იღებენ. გვინდა, ვნახოთ, ილია ისლიამ მახაჩევს როგორ დააფინიშებს და ვიცით, რომ მას ეს შეუძლია. იმედია, UFC-ი ამის შანსს მისცემს.

ალექსანდრეს რაც შეეხება, ის მზადაა, ხვალვე იჩხუბოს. თარიღებსა და მეტოქეებს UFC-ი არჩევს და მათ გადაწყვეტილებებს პატივი უნდა ვცეთ, მაგრამ როგორც ილია, ისე ალექსანდრეც მზადაა, ნებისმიერ გამოწვევას გაუმკლავდეს. ალექსანდრეს შეუძლია, ჩემპიონი გახდეს, ილიას კი შეუძლია, ორი წონითი დივიზიონის ჩემპიონი იყოს“.

ცნობისთვის, მახაჩევისა და თოფურიას შესაძლო ჩხუბის შესახებ ახალი ინფორმაცია ჯერ არ გავრცელებული. რუსი მებრძოლის წარმომადგენლები თვლიან, რომ „ლეგენდამ“ საჩემპიონო ჩხუბი უნდა დაიმსახუროს და ტოპ 5-ის წარმომადგენელი დაამარცხოს.