„პრემიერ ლიგის ფეხბურთელი გახდება“ | რას წერს BBC-ი ჩაკვეტაძეზე
ავტორიტეტულმა ბრიტანულმა სააგენტომ, BBC-იმ „უოტფორდის“ ქართველ ფეხბურთელს, გიორგი ჩაკვეტაძეს სტატია მიუძღვნა. BBC-ის ჟურნალისტმა, ჯეფ დოილიმ „ჩაკვე“ შეაქო და განაცხადა, რომ გიორგი პრემიერ ლიგაში აუცილებლად მოხვდება.
„წელიწადის ის დრო დადგა, როცა სეზონის სიმბოლურ ნაკრებებს ადგენენ და უოტფორდის ქართველი ფეხბურთელი, გიორგი ჩაკვეტაძე ჩემპიონშიპის ტოპ 11-ში მოხვედრის კანდიდატია. კრაზანების მაისურით, სოლიდური გამოსვლა სხვა მოთამაშეებმაც აჩვენეს და რამდენიმე მათგანს ტრავმა რომ არ მიეღო, შანსი ექნებოდა, მაგრამ ჩაკვეტაძე მთელი სეზონია, სტაბილურად მაღალ დონეზე თამაშობს.
გიორგი მეტოქეებისთვის მუდმივი საფრთხეა და მის მიერ ჩატარებული ცუდი მატჩების ჩამოსათვლელად ცალი ხელიც საკმარისია. ჩაკვეტაძე ჩემპიონშიპის ლიდერია ბურთთან ერთად მოპოვებული მანძილის რაოდენობით და მისი სოლორეიდების უმრავლესობა სახიფათო მომენტით სრულდება. მისი შთამბეჭდავი სტატისტიკა გვიჩვენებს, რომ ჩაკვეტაძეს მეტოქე გუნდების ხაზების გაჭრა და მესამე ნახევარში შესვლა საუკეთესოდ გამოსდის.
ტომ კლევერლიმ ის ჯეკ გრილიშს შეადარა. ჩემი აზრით, ჩაკვეტაძეს ბურთის წაღება გრილიშზე კარგად შეუძლია და ვფიქრობ, სავინიოსთან შედარება უკეთესი იქნებოდა. უფრო მაღალ დონეზე გადასასვლელად, მას თავსატეხის ბოლო ნაწილი ესაჭიროება - გოლები და ასისტები.
გიორგი ბევრ მომენტს ქმნის და საინტერესოა, მისი ასისტების რაოდენობა უფრო მაღალი იქნებოდა თუ არა უკეთეს გუნდში. ამაზე კამათი შეიძლება, მაგრამ კომპონენტი, რომელზეც ნამდვილად სამუშაო აქვს, გატანილი გოლებია.
38 შეხვედრაში შეგდებული 2 ბურთი მისი ტალანტის მქონე ფეხბურთელისთვის საკმარისი არაა. შესაძლოა, პრობლემა ზეწოლის დროს, დარტყმის ტექნიკა იყოს, მაგრამ კლევერლის მიაჩნია, რომ მთავარი გამომწვევი ფაქტორი გიორგის დამოკიდებულებაა და ამაზე მუშაობა ნამდვილად შეიძლება.
დარწმუნებული ვარ, ჩაკვეტაძე პრემიერ ლიგის ფეხბურთელი გახდება, მაგრამ გატანილი გოლების რაოდენობამ შესაძლოა გავლენა იქონიოს იმაზე თუ რა დონის კლუბი გადაწყვეტს მის შეძენას. სეზონში, რომელშიც ბევრი საოცარი შემტევი ფეხბურთელი ნამდვილად არ გვყავს, ჩაკვეტაძეს შეუძლია, სეზონის სიმბოლურ ნაკრებში მოხვდეს“, - წერს BBC.
ცნობისთვის, ჩაკვეტაძის „უოტფორდს“ 53 ქულა აქვს და ჩემპიონშიფის პლეიოფში მოსახვედრად იბრძვის. „კრაზანები“ მეექვსე ადგილზე მყოფ „ვესტ ბრომვიჩს“ 4 ქულით ჩამორჩებიან და მომდევნო შეხვედრა „ბრისტოლ“ სიტისთან“ ელით, რომელსაც ასევე 57 ქულა აქვს.
