„კაცთან არ ვიფარიკავებ“ | დისკვალიფიკაცია ტრანსგენდერთან შეხვედრაზე უარის გამო
აშშ-ში, მერილენდის უნივერსიტეტში გამართულმა ფარიკაობის ტურნირმა საყოველთაო ყურადღება მიიქცია. ამის მიზეზი სტეფანი ტერნერის გადაწყვეტილებაა, რომელმაც ტრანსგენდერ მოწინააღმდეგესთან ფარიკაობაზე უარი განაცხადა.
ტერნერი რედმონდ სალივანს უნდა შეხვედროდა, მაგრამ მატჩის დაწყებამდე, ცალ მუხლზე დაიჩოქა და პროტესტის ნიშნად, ჩაფხუტი მოიხადა. საბოლოოდ, მას შავი ბარათი უჩვენეს და ტურნირიდან დისკვალიფიკაცია მისცეს.
„ვნახე, რომ ჯგუფში რედმონდთან ერთად ვიქნებოდი და თავიდანვე გადავწყვიტე, რომ მუხლს მოვიყრიდი. ვიცოდი, რომ ეს უნდა გამეკეთებინა, რადგან აშშ-ის ფარიკაობის ფედერაცია ქალთა პროტესტს ყურად არ იღებს.
როდესაც მუხლი მოვიყარე, მსაჯს გავხედე და ვუთხარი: „არ შემიძლია. ქალი ვარ, ჩემი მეტოქე კაცია და ეს ქალთა ტურნირია. ამ ადამიანის წინააღმდეგ არ ვიფარიკავებ. რედმონდმა ვერ გაიგო, რა ვთქვი. მომიახლოვდა, ეგონა, რომ ტრავმირებული ვიყავი და მკითხა, როგორ ხარო. ვუთხარი, დიდ პატივს გცემ, მაგრამ შენთან ფარიკაობას არ ვაპირებ-მეთქი“, - განაცხადა ტერნერმა შეხვედრის შემდეგ.
საინტერესოა, რომ მომხდარიდან რამდენიმე საათის შემდეგ, აშშ-ის ფარიკაობის ფედერაციამ ოფიციალური განცხადება გაავრცელა და სალივანს მხარდაჭერა გამოუცხადა.
