რეალთან მატჩების წინ - არსენალმა წამყვანი მცველი დაკარგა

მადრიდის „რეალთან“ გასამართი ჩემპიონთა ლიგის მეოთხედფინალური მატჩების წინ, ლონდონის „არსენალმა“ სერიოზული დანაკლისი განიცადა - 1 აპრილს, „ფულემთან“ ინგლისის პრემიერ ლიგის შეხვედრის მე-16 წუთზე გაბრიელ მაგალიაეშმა თამაშის გაგრძელება ვეღარ მოახერხა და შეცვლა ითხოვა. დეტალურმა სამედიცინო გამოკვლევამ კი აჩვენა, რომ ბრაზილიელ ცენტრალურ მცველს ბარძაყის უკანა კუნთი გაუწყდა, რის გამოც ქირურგიული ჩარევა სჭირდება და მისთვის წლევანდელი სეზონი დასრულებულია.

მომხდარ ფაქტთან დაკავშირებით მცირე კომენტარი გააკეთა „მეთოფეების“ ესპანელმა დამრიგებელმა მიკელ არტეტამ, რომელმაც აღნიშნა, რომ გაბრიელს მისი გუნდის დაცვის სიმწყობრეში გადამწყვეტი როლი აკისრია, თუმცა „არსენალის“ წარმატებებს მხოლოდ ერთი ფეხბურთელის უმაღლეს დონეზე ასპარეზობა არ განსაზღვრავს და მაქსიმალურად შეეცდებიან, შექმნილი მძიმე მდგომარეობიდან გამოსავალი მოძებნონ.

სამეფო კლუბთან ჩემპიონთა ლიგის მეოთხედფინალის პირველ მატჩამდე, პრემიერ ლიგის მორიგ შეხვედრას შაბათს, 5 აპრილს, „გუდისონ პარკზე“ „ევერტონის“ წინააღმდეგ ჩაატარებენ. ოცდაათი ტურის შემდეგ „არსენალი“ სატურნირო ცხრილში მეორე ადგილზეა და ლიდერ „ლივერპულს“ 12 ქულით ჩამორჩება.