„გავაფრთხილე, რომ სინერთან ეს არ გამოეყენებინა“ - დოპინგ-სკანდალის ახალი დეტალები

იანიკ სინერთან დაკავშირებული დოპინგ-სკანდალის შესახებ კომენტარი საქმის ერთ-ერთმა მთავარმა ფიგურანტმა, ფიტნეს-ინსტრუქტორმა უმბერტო ფერარამ გააკეთა. იტალიელი ჩოგბურთელის განცხადებით, მის ორგანიზმში კლოსტებოლი ფიზიოთერაპევტის ჯაკომო ნალდის დახმარებით მოხვდა, რომელიც მას მასაჟს ჭრილობის დასამუშავებლად სწორედ ფერარას რეკომენდაციით უკეთებდა. აგვისტოში სინერმა როგორც ფერარასთან, ასევე ნალდისთან თანამშრომლობა შეწყვიტა და თუ რატომ ურჩია იანიკს მსგავსი სახით მკურნალობა, ამის თაობაზე დასმულ შეკითხვას ფიტნეს-ინსტრუქტორმა ასეთი პასუხი გასცა:

„მე მას ქრონიკული დაავადებების სამკურნალოდ ვიყენებდი, რადგან ექიმმა გამომიწერა და სანდოობაზე არცკი მიფიქრია. აკრძალვების შესახებაც ძალიან კარგად ვიცოდი და მაქსიმალური სიფრთხილით ჩემს პირად კოსმეტიკურ ჩანთაში ვინახავდი.

სინერის ფიზიოთერაპევტისთვის არაფერი არ გადამიცია, უბრალოდ შევთავაზე, რომ გამოეყენებინა თითზე არსებული ჭრილობის სამკურნალოდ, რომელიც მას როგორც მასაჟისტს, სათანადოდ მუშაობაში ხელს უშლიდა. გარდა ამისა, ძალიან ნათლად და ხაზგასმით ავუხსენი, რომ ეს პრეპარატი აკრძალულ ნივთიერებებს შეიცავდა და არავითარ შემთხვევაში არ უნდა გამოეყენებინა იანიკთან მიმართებაში. დაკითხვის დროს კი ნალდიმ არ უარყო, რომ გავაფრთხილე, თუმცა აღიარა, რომ არაფერი ახსოვდა“.

შეგახსენებთ, რომ სინერის ორგანიზმში აკრძალული ნივთიერება ერთი წლის წინ აღმოაჩინეს, რის გამოც ამჟამად დისკვალიფიცირებულია. მისი სასჯელი ძალაში 2025 წლის 9 თებერვალს შევიდა და 4 მაისს სრულდება.