„ილიას გასაოცარი არაფერი გაუკეთებია“ | დენ ჰუკერი თოფურიასა და ვოლკის ჩხუბზე

UFC-ის მსუბუქი წონითი დივიზიონის მებრძოლმა, დენ ჰუკერმა ილია თოფურიასა და ალექსანდრ ვოლკანოვსკის საჩემპიონო ჩხუბზე ისაუბრა, რომელიც ქართველმა ნოკაუტით მოიგო. ჰუკერის აზრით, „ლეგენდას“ არაფერი განსაკუთრებული არ გაუკეთებია და „ვოლკის“ მარცხი ნაადრევად დაბრუნებით იყო განპირობებული.

„ისლამ მახაჩევთან გამართული ჩხუბისა და ნოკაუტის შემდეგ, ვოლკანოვსკი ოქტაგონზე ძალიან მალე დაბრუნდა. თოფურიას არაფერი გასაოცარი არ გაუკეთებია. მან უბრალოდ იჩხუბა და გაიმარჯვა.

ვოლკანოვსკის მსგავს სიტუაციაში მეც ვყოფილვარ. პოლ ფელდერისა და დასტინ პორიეს შემდეგ, ვიჩქარე და მაიკლ ჩენდლერს ვეჩხუბე (ჰუკერი პირველ რაუნდში ტექნიკური ნოკაუტით დამარცხდა). იგივე მოხდა მაშინაც და ჩენდლერს არაფერი განსაკუთრებული არ გაუკეთებია.

როცა ვეტერანი მებრძოლი ხარ, გაკვეთილების მიღება საჭიროა. უნდა გაანალიზო, რომ ორგანიზმს კონკრეტული ოდენობის ზიანის ატანა შეუძლია, შემდეგ კი სრულად აღსადგენად დრო სჭირდება. განსაკუთრებით, თუ 5-რაუნდიანი ორთაბრძოლებისთვის საჭირო მოსამზადებელ კემპს გადიხარ. გრძელი პაუზის აღება აუცილებელია და 5-რაუნდიანი ჩხუბისთვის საჭირო მოსამზადებელი კემპიდან ძალების აღსადგენად დრო უმნიშვნელოვანესია“.

შეგახსენებთ, რომ ვოლკანოვსკი ოქტაგონზე მალე დაბრუნდება. 13 აპრილს, UFC 314-ის მთავარ მოვლენაში, „ვოლკი“ ქვემსუბუქი წონითი დივიზიონის საჩემპიონო ქამრის დასაკუთრებას შეეცდება და დიეგო ლოპესს დაუპირისპირდება.