„მის გუნდში თამაში არავის უნდოდა“ | ყოფილმა თანაგუნდელმა ქეცბაია გაიხსენა
თემურ ქეცბაიას ყოფილმა თანაგუნდელმა, იოზეფ კოჟლეიმ ლეგენდარულ ქართველ ფეხბურთელზე ისაუბრა. კოჟლეი Cablenet-ის ერთ-ერთი გადაცემის სტუმარი იყო და „ანორთოსისში“ გატარებული პერიოდი გაიხსენა.
„თემური გიჟია. მასთან როგორც მოთამაშესთან, ისე მთავარ მწვრთნელთან ვიმუშავე და ძალიან ემოციური ადამიანია. ვარჯიშებზე, მის გუნდში თამაში არავის უნდოდა, ყველას სურდა, მის წინააღმდეგ ყოფილიყო.
ქეცბაიას ფეხბურთი ძალიან უყვარს და ბევრ ადამიანს უყვიროდა. ჩემზე ოდნავ უფროსია, მაგრამ პატივს მცემდა. მაჩვენებდა იმას, რაც არ მოსწონდა და მიხსნიდა რა უნდა გამეკეთებინა, მაგრამ ჩემთვის არასდროს დაუყვირია“.
ცნობისთვის, ქეცბაია „ანორთოსისში“ 2002-დან 2009 წლამდე ასპარეზობდა. 2004-ში, თემური მოთამაშე მწვრთნელი გახდა, კვიპროსული გუნდი კი 2009 წელს დატოვა. ქეცბაიამ „ოლიმპიაკოსის“ მთავარი მწვრთნელის პოსტი დაიკავა, მოგვიანებით კი საქართველოს ეროვნული ნაკრების თავკაცი გახდა.
