„კარგი პერიოდი უდგას, მასთან ამ საკითხზე ვიმუშავეთ“ | ფონსეკამ მიქაუტაძეზე ისაუბრა

„ლიონის“ მთავარმა მწვრთნელმა, პაულო ფონსეკამ მატჩისწინა პრესკონფერენცია გამართა. გიორგი მიქაუტაძის გუნდის მომდევნო მეტოქე „ლილი“ გახლავთ და პორტუგალიელმა სპეციალისტმა ჟურნალისტების შეკითხვებს უპასუხა, რომლებიდან ერთ-ერთიც ქართველი თავდამსხმელის შესახებ იყო.

„გიორგი მიქაუტაძისგან არაფერ განსხვავებულს არ ვითხოვ. მისგან თავიდანვე ასეთ თამაშს ველოდი. მიქაუტაძეს კარგი პერიოდი უდგას, მაგრამ ალექსანდრ ლაკაზეტიც გვყავს, რომელიც გუნდისთვის ძალიან მნიშვნელოვანი ფეხბურთელია.

მიმდინარე კვირას გამართულ ვარჯიშებზე, უფრო მეტად შეტევაზე ვიმუშავეთ, ვიდრე დაცვაზე. მიქაუტაძის პროგრესი გუნდის პროგრესსაც ასახავს. სწორედ გუნდი უქმნის თავდამსხმელს გოლის გასატან მომენტებს.

როდესაც ლიონში მოვედი, მიქაუტაძე უფრო მეტად ინსტინქტური ფეხბურთელი იყო, ბევრს დარბოდა და ყოველთვის უნდოდა, ბურთს შეხებოდა. ვიმუშავეთ, რომ უფრო მომთმენი გამხდარიყო და სწორ მომენტს დალოდებოდა, რათა ბურთს შეხებოდა. ვფიქრობ, გიორგის აქვს უნარი, სხვადასხვა სივრცეებში ითამაშოს“.

შეგახსენებთ, რომ მიმდინარე სეზონში, „ლიონის“ მთავარი ამოცანა ჩემპიონთა ლიგის საგზურის დასაკუთრებაა. მიქაუტაძის გუნდს 45 ქულა აქვს და სატურნირო ცხრილის მეშვიდე პოზიციას იკავებს, მისი მომდევნო მეტოქე, „ლილი“ კი 47 ქულით მეხუთე ადგილზეა.