6 მოგება 40 მატჩში - ბარსა სიმეონეს აქილევსის ქუსლია

თუ რაიმე სასწაული არ მოხდა, „ატლეტიკო“ წლევანდელ სეზონს უტიტულოდ დაასრულებს. უკანასკნელი სამი კვირის განმავლობაში როხიბლანკო ჯერ თანაქალაქელ „რეალთან“ მარცხის შემდეგ ჩემპიონთა ლიგას დაემშვიდობა, ხოლო გუშინ საკუთარ სტადიონზე „ბარსელონასთან“ (0:1) ვერ გააწყო ვერაფერი და კოპა დელ რეის ფინალს მიღმა დარჩა. რაც შეეხება ლა ლიგას, ლიდერ „ბლაუგრანასთან“ „ატლეტიკოს“ ჩამორჩენა 9 ქულას შეადგენს, რაც ამ გუნდის საჩემპიონო შანსებს მიზერულს ხდის.

როხიბლანკოს მთავარი მწვრთნელის დიეგო სიმეონეს დაპირისპირებები „ბარსელონასთან“ საერთოდ ცალკე საუბრის თემაა - 2012 წლიდან მოყოლებული, ანუ მას შემდეგ რაც ის მადრიდულ გრანდს სათავეში ჩაუდგა, „ბლაუგრანასთან“ ჩატარებული 40 მატჩიდან მხოლოდ 6 მოიგო, 12 ფრედ დაასრულა და 22-ში დამარცხდა, ბურთების შეფარდება კი 39:61-ზეა.

ბუნებრივია, ასეთი კალიბრის კლუბის უტიტულოდ დარჩენის გამო, მთელი პასუხისმგებლობა მთავარ მწვრთნელზე მოდის, რის გამოც ჩოლოს მის მიმართ გაკეთებული საკმაოდ კრიტიკული განცხადებების მოსმენა მოუწია, თუმცა როგორც თავად აღნიშნა, მისი მომზადებული გუნდი წელს ცუდად არ გამოიყურება და უბრალოდ არ უმართლებთ. აქვე გეტყვით, რომ მომდევნო შეხვედრას „ატლეტიკო“ ლა ლიგაში სტუმრად „სევილიასთან“ გამართავს, რომელიც კვირას, თბილისის დროით, 18:15 წუთზე დაიწყება.