„მასტურბაცია, პოკერი, მარიხუანა და სოცქსელები წარსულში დავტოვე“ - ომალი

UFC-ის ექსჩემპიონმა, შონ ომალიმ, რომელიც 7 ივნისს სუპერმსუბუქი წონის მოქმედ ჩემპიონს, მერაბ დვალიშვილს დაუპირისპირდება, თავის პოდკასტში ისაუბრა იმაზე, რა შეიცვალა მისი და „მანქანის“ პირველი დაპირისპირების შემდეგ, რომელიც მერაბის გამარჯვებით დასრულდა.

რა თქვა ომალიმ:

„ჩემს ცხოვრებაში ბევრი რამ შეიცვალა და ეს ცვლილებები ჩემს ჩხუბზე დადებითად აისახება. მაგალითად, სოციალურ ქსელებს აღარ ვიყენებ. გადავწყვიტე, რომ 2025 წელს სოცქსელებით აღარ ვისარგებლებ. ჯერ მხოლოდ სამი თვეა გასული, მაგრამ უკვე ვგრძნობ, რომ ამან ჩემი ცხოვრება შეცვალა.

გარდა ამისა, 2025 წელს მასტურბაციასაც შევეშვი, კომპიუტერულ თამაშებს აღარ ვთამაშობ - ადრე დღეში 2-3 საათს ვთამაშობდი. ასევე მეგობრებთან ერთად პოკერს ვთამაშობდი, რომელზეც ძალიან რთულია უარის თქმა: ყოველ ჯერზე ფიქრობ - „კარგი, ერთი დარიგებაც და მორჩა“.

მარიხუანას აღარ ვეწევი - ეს ძალიან სპონტანურად მოხდა. არ მომწონდა, როგორც მოქმედებდა ის ჩემზე. ახლა ზედმეტს არ ვჭამ, უკეთ მძინავს - დარწმუნებული ვარ, ეს ყველაფერი ჩემს ფორმაზე დადებითად აისახება“.

ცნობისთვის, „მანქანისა“ და „შუგას“ დაპირისპირება 7 ივნისს, ნიუ-ჯერსიში UFC 316-ზე გაიმართება. დვალიშვილი ტიტულს მეორედ დაიცავს, ომალი კი შეეცდება, დაიბრუნოს საჩემპიონო ქამარი, რომელიც სწორედ მერაბთან ჩხუბის შედეგად დაკარგა.