კვარა ანჟერთან სათამაშოდ მზადაა - დაბრუნდა და საერთო ჯგუფში ივარჯიშა

ხვიჩა კვარაცხელიას „პარი სენ-ჟერმენი“ ლიგა 1-ში „ანჟერთან“ დაგეგმილი მატჩისთვის ემზადება. მატჩში, რომელიც 5 აპრილს, თბილისის დროით 19:00 საათზე დაიწყება, პარიზელებს ჩემპიონობის მოპოვება შეუძლიათ და ამისთვის მათ ფრეც დააკმაყოფილებთ.

1 აპრილს ლუის ენრიკეს გუნდმა საფრანგეთის თასის ნახევარფინალში, მძიმე ბრძოლაში მეორელიგელი „დუნკერკი“ დაამარცხა (4:2) და ფინალის საგზური მოიპოვა, სადაც „რეიმსს“ დაუპირისპირდება. ამ შეხვედრაში მონაწილეობა ვერ მიიღო პსჟ-ის ქართველმა შემტევმა, ხვიჩა კვარაცხელიამ, რომელიც მატჩის განაცხადში ვირუსის გამო ვერ მოხვდა.

ფრანგული მედიის ინფორმაციით, კვარაცხელია უკვე სრულად გამოჯანმრთელდა და გუნდთან ერთად სრული ვარჯიშიც ჩაატარა. კვარას გარდა, საერთო ჯგუფში დაბრუნდნენ ტრავმირებულები არნაუ ტენასი და იბრაჰიმ მბაიე.

ცნობისთვის, ლიგა 1-ის დასრულებამდე 7 ტურით ადრე სატურნირო ცხრილში პარიზელები 71 ქულით ლიდერობენ, უახლოეს მდევარ „მონაკოს“ კი 50 ქულა აქვს. 

რაც შეეხება კვარაცხელიას, მას პსჟ-ის მაისურით ყველა ტურნირზე 15 მატჩი აქვს ჩატარებული. ქართველი შემტევის ანგარიშზე 3 გოლი და 4 საგოლე გადაცემაა.