ოქროს ხელთათმანის კანდიდატი ფორესტიდან - ნოტინგემის მეკარის უნიკალური შანსი

სრულიად შესაძლებელია, რომ ინგლისის პრემიერ ლიგის სეზონის საუკეთესო მეკარისთვის დაწესებული „ოქროს ხელთათმანის“ პრიზის გამარჯვებული გულშემატკივართათვის ნამდვილი სიურპრიზი იყოს. გათამაშების დაწყებამდე ჯილდოს მიღების მთავარ ფავორიტად ჩემპიონი გუნდის „მანჩესტერ სიტის“ კიპერს ასახელებდნენ, თუმცა ედერსონის ტრიუმფის შანსები მიზერულია, რადგან მან 29 მატჩიდან საკუთარი კარი მშრალად მხოლოდ ხუთში შეინახა. ახლა კი ამის მთავარი კანდიდატი წლევანდელი სეზონის მთავარი სენსაციის, „ნოტინგემის“ გოლკიპერი მატს სელსია, რომელმაც 30 თამაშიდან გოლი 13-ში არ გაუშვა, გაშვებული ბურთების რაოდენობით კი, „ფორესტი“ მხოლოდ „არსენალსა“ და „ლივერპულს“ ჩამორჩება.

33 წლის მატს სელსი „ნოტინგემმა“ 2023 წელს „სტრასბურგიდან“ 8 მილიონ ევროდ შეიძინა და უნდა აღინიშნოს, რომ განსაკუთრებულად წარმატებული კარიერით აქამდე არ გამოირჩეოდა, თუმცა ბელგიის ნაკრებში, სადაც მისი დებიუტი მხოლოდ და მხოლოდ 2021 წელს, 29 წლის ასაკში შედგა, 9 მატჩის ჩატარება მოასწრო და ახლა მისი ძირითადიდან ამოგდება ტიბო კურტუას უთუოდ გაუჭირდება.

„ოქროს ხელთათმანის“ პრიზი ინგლისის ჩემპიონატში 2005 წლიდან თამაშდება და აქამდე ეგრეთწოდებული „ზედა ექვსეულის“ გუნდების წარმომადგენლების გარდა, სხვა არც ერთი კლუბის მეკარეს არ მოუგია. სელსი კი, როგორც ჩანს, მეორე ეშელონის გუნდებისთვის ამ საშინელი ტრადიციის დარღვევას აპირებს, რადგან მის ანგარიშზე უკვე 93 სეივია, რითაც ისტორიაში მხოლოდ „ბრენტფორდის“ კარის დარაჯ მარკ ფლეკენს ჩამორჩება. სელსის მთავარი კონკურენტი „არსენალელი“ დავიდ რაია იქნება, რომელმაც 11 მატჩში არ გაუშვა ბურთი. ესპანელის შანსები შეიძლება იმიტომაც იყოს უფრო მაღალი, რომ „მეთოფეებს“ „ფორესტზე“ უკეთესი დაცვის ხაზი ჰყავთ. მესამე-მეოთხე ადგილებს კი ამ ეტაპისთვის დინ ჰენდერსონი (კრისტალ პალასი) და ჯორდან პიკფორდი (ევერტონი) ინაწილებენ.

საქმეს ართულებს ის ფაქტიც, რომ „ნოტინგემს“ საკმაოდ რთული კალენდარი აქვს: „ასტონ ვილა“, „ევერტონი“, „ტოტენჰემი“, „ბრენტფორდი“, „კრისტალ პალასი“, „ლესტერი“, „ვესტ ჰემი“ და „ჩელსი“. თუმცა, შესაძლოა, როგორც მისი გუნდისთვის, ასევე სელსისთვის წლევანდელი ზღაპარი ზღაპრული წარმატებით დასრულდეს და „ფორესტმა“ ლიგის საგზური, ხოლო ბელგიელმა კიპერმა „ოქროს ხელთათმანი“ მოიპოვოს.