„მე ჯერჯერობით მახაჩევს ჩხუბს არ ჩავუნიშნავდი“ - რას ამბობს დემეტრიუს ჯონსონი
UFC-ის ექსჩემპიონმა, დემეტრიუს ჯონსონმა მსუბუქი წონითი დივიზიონის ჩემპიონის, ისლამ მახაჩევის მომავალზე ისაუბრა და საკუთარი აზრი გამოთქვა იმასთან დაკავშირებით, ვინ უნდა იყოს დაღესტნელი მებრძოლის მომდევნო მეტოქე.
რა თქვა ჯონსონმა:
„მე ჯერჯერობით მახაჩევს ჩხუბს არ ჩავუნიშნავდი და დაველოდებოდი იმას, თუ როგორ განვითარდება მოვლენები ქვესაშუალო წონაში. თუ ჯეკ დელა მადალენა ჩემპიონი გახდება, მახაჩევი შეძლებს, მეორე ქამრისთვის იბრძოლოს.
მსუბუქ წონაში მახაჩევმა თითქმის ყველას მოუგო, ამიტომ მე არ ვიქნები წინააღმდეგი, თუ მას ორმაგი ჩემპიონობის შანსს მისცემენ.
თუ ბელალ მუჰამედი ჯეკ დელა მადალენას მოუგებს, მაშინ მახაჩევმა ჩარლზ ოლივეირასთან იჩხუბოს, ილია თოფურია კი რეიტინგის პირველ ნომერს, არმან ცარუკიანს დაუპირისპირდეს. მსუბუქ წონაში ძალიან ბევრი ძლიერი მებრძოლია. მაინტერესებს, შეძლებს თუ არა თოფურია ტოპ-მებრძოლის დამარცხებას“.
არსებული ინფორმაციით, ისლამ მახაჩევი მიიჩნევს, რომ ილია თოფურიამ მასთან შეხვედრამდე ჯერ მსუბუქ წონაში სულ მცირე ერთი ჩხუბი უნდა მოიგოს.
რაც შეეხება თოფურიას, რამდენიმე დღის წინ „ლეგენდამ“ განაცხადა, რომ საჩემპიონო ქამრის დათმობის სანაცვლოდ, UFC მას სატიტულო ჩხუბს დაჰპირდა.
