სამი მედალი ბაქოდან - ქართველი ტანმოვარჯიშეების წარმატება
აზერბაიჯანის დედაქალაქ ბაქოში გამართული პრესტიჟული საერთაშორისო ტურნირი საქართველოს ტანმოვარჯიშეთა ახალგაზრდულმა ნაკრებმა ტრიუმფით დაასრულა. ჩვენი ქვეყნის სახელით საერთო ჯამში ექვსი სპორტსმენი ასპარეზობდა, რომელთაც სამ სხვადასხვა დისციპლინაში სამივე სინჯის მედალი მოიპოვეს.
გურზებით ვარჯიშში, რომელიც ქართველმა ტანმოვარჯიშეებმა რაჭული ცეკვის ფონზე შეასრულეს, საუკეთესო შედეგი აჩვენეს და ჩემპიონები გახდნენ. მრავალჭიდის დისციპლინაში საქართველოს ახალგაზრდული ნაკრები ვიცე-ჩემპიონობას დასჯერდა, ხოლო რგოლებით ვარჯიშში საპრიზო მესამე ადგილი დაიკავა. პრესტიჟულ შეჯიბრებაში ჩვენი ქვეყნის ღირსებას ექვსი სპორტსმენი, ლიზი გზირიშვილი, მარიამ ბერიაშვილი, ანამარია ლაშხი, ბარბარე ნიგურიანი, რუსუდან ქურდოვანიძე და ლიზი ადეიშვილი იცავდა.
ქართველ ტანმოვარჯიშეებს აპრილის ბოლოს კიდევ ერთ წარმომადგენლობით შეჯიბრებაზე გამოსვლა მოუწევთ, როდესაც ევროპის თასი გაიმართება და მისი მასპინძელიც აზერბაიჯანის დედაქალაქი ბაქო იქნება.
