მსოფლიო რეიტინგის ლიდერი - ქართველი ტაეკვონდოისტის წარმატება
ქართული ტაეკვონდოს ისტორიული წარმატება - მოხდა პირველი შემთხვევა და სპორტის ამ სახეობის მსოფლიო რეიტინგში ქართველი სპორტსმენი ზურაბ კინწურაშვილი გალიდერდა. 74 კილოგრამ წონით კატეგორიაში მოასპარეზე კინწურაშვილმა 2024 წელს უამრავ მნიშვნელოვან ტურნირებში იასპარეზა და ყველაზე დიდ წარმატებას ევროპის ჩემპიონატზე მიაღწია, სადაც ვერცხლის პრიზიორი გახდა.
კინწურაშვილი 2002 წლის 19 თებერვალს ბათუმში დაიბადა და სანამ უფროსი ასაკის სპორტსმენებს შორის შეჯიბრებებში ჩაერთვებოდა, რამდენიმე წარმატებას უმცროსებს შორისაც მიაღწია. კერძოდ, 2015 წელს გერმანიაში პრესტიჟული საერთაშორისო ტურნირის გამარჯვებული გახდა, ორი წლის შემდეგ კი ანალოგიური შედეგი ლატვიის დედაქალაქ რიგაშიც გაიმეორა.
როგორც უკვე მოგახსენეთ, გასულ წელს ზურასთვის ყველაზე წარმატებული კონტინენტის პირველობაზე მოპოვებული ვიცე-ჩემპიონის ტიტული იყო. თუმცა, კინწურაშვილმა სპორტის ამ სახეობის ისტორიაში ქართველებს შორის იქამდეც აჩვენა საუკეთესო შედეგი და გახდა ჩვენი ქვეყნის პირველი წარმომადგენელი, რომელმაც ტაეკვონდოში უმაღლესი რანგის შეჯიბრება მოიგო - მან ოქროს მედალი 2023 წელს პოლონეთის ქალაქ კრაკოვში გამართულ ევროპულ თამაშებზე მოიგო.
