ჩხუბი, 4 წითელი, ოსიმენის დუბლი, მოურინიომ ვიზავის სახეში ჩაარტყა

თურქეთის თასის 1/4-ფინალში სტამბოლური დერბი შედგა - „ფენერბახჩემ“ საკუთარ მოედანზე „გალათასარაის“ უმასპინძლა და 1:2 დამარცხდა. ჟოზე მოურინიოს გუნდი გათამაშებას გამოეთიშა.

შეხვედრის მთავარი გმირი ვიქტორ ოსიმენი გახდა, რომელმაც დუბლი შეასრულა და თავის შედეგიანობას ამ სეზონში განაგრძობს. ნიგერიელის ანგარიშზე „გალათასარაის“ რიგებში 32 მატჩში, 28 გოლი და 5 საგოლე გადაცემაა.

„ფენერს“ სებასტიან შიმანსკის გოლმა ვერ უშველა. სამაგიეროდ მატჩმა აფიშა გაამართლა და სტამბოლურ დერბიში მორიგი ჩხუბი ვიხილეთ. შეხვედრის მიწურულს ფეხბურთელებმა ხელჩართული ბრძოლა გამართეს, მთავარმა არბიტრმა კი 3 მათგანს წითელი ბარათი უჩვენა.

და მაინც, შეხვედრის მთავარი მომენტი ჟოზე მოურინიოს უხეშობა იყო. „განსაკუთრებულმა“ თავის ვიზავის „გალას“ მთავარ მწვრთნელს ოკან ბურუკს ცხვირზე ისე მოქაჩა, რომ ძირს დააგდო. არბიტრმა წითელი ბარათი ჟოზესაც უჩვენა.

აქვე გეტყვით, რომ თურქეთის სუპერლიგაში 28 ტურის შემდეგ 71 ქულით „გალათასარაი“ ლიდერობს. „ფენერბახჩეს“ 65 წულა აქვს, თუმცა მატჩით ნაკლები აქვს გამართული და მოგების შემთხვევაში ჩამორჩენას 3 ქულამდე შეამცირებს.