ფინალში ელ კლასიკო გველის! ბარსელონამ ატლეტიკო დაამარცხა

ესპანეთის სამეფო თასის ნახევარფინალის განმეორებით შეხვედრაში მადრიდის „ატლეტიკომ“ „ბარსელონას“ უმასპინძლა და 0:1 დამარცხდა.  პირველი შეხვედრა კატალონიაში ფრედ 4:4 იყო დასრულებული.

ჰანსი ფლიკის გუნდმა პირველ ტაიმში მეტოქე მოედნიდან გააქრო და ყველა ასპექტში დაჯაბნა. საბოლოოდ უპირატესობა ტაბლოზეც ასახეს და 27-ე წუთზე ლამინ იამალის პასით ფერან ტორესმა ანგარიში გახსნა. სტუმრებს მეორეს გატანაც შეეძლოთ და მომენტებიც საკმაოდ ჰქონდათ.

მეორე ტაიმში სიმეონემ ოთხმაგი შეცვლა განახორციელა, ყვითელი ბარათის მქონე ფეხბურთელები შეცვალა და რაც აღსანიშნავია, მოედანზე სორლოტი შეუშვა, რომელმაც ამ სეზონში „ბარსას“ ორივე ლა ლიგურ შეხვედრაში გაუტანა. ნორვეგიელს მომენტები ამჯერადაც ჰქონდა, თუმცა ძველებურად ცივსისხლიანი ვეღარ იყო.

საბოლოოდ ფლიკმა მოედანზე არაუხოს შეშვების შემდეგ სორლოტი გაანეიტრალა და მთლიანად მატჩის გაკონტროლებაც შეძლეს. ტაბლოზე კი ლოგიკური შედეგი დაფიქსირდა.

შეგახსენებთ, რომ ფინალში „ბარსელონას“ მეტოქე მადრიდის „რეალი“ იქნება. 26 აპრილს (20:00) სევილიაში „ლა კარტუხაზე“ „ელ კლასიკო“ გველის!