“მნიშვნელოვანი როლი აღარ ექნება“ - კომპანი ტომას მიულერზე

რამდენიმე დღის წინ, ცნობილი გახდა, რომ მიმდინარე სეზონის დასრულების შემდეგ, ტომას მიულერი მიუნხენის ბაიერნს დატოვებს.

რეკორდმაისტერის ლეგენდას გუნდთან კონტრაქტი ეწურება და მისი წასვლის მიზეზი სწორედ ეს არის. როგორც ცნობილი გახდა, ბაიერნს არ სურს ტომასისთვის ხელშეკრულების გახანგრძლივება.

დღეს, ავტორიტეტული გამოცემა BILD საინტერესო ინფორმაციას ავრცელებს. ვიგებთ, რომ მიულერისთვის კონტრაქტის არ გახანგრძლივებაში საკმაოდ დიდი წვლილი ვენსან კომპანის მიუძღვის.

წყაროს ცნობით, ბაიერნის ხელმძღვანელებმა მაქს ებერლმა და კრისტოფ ფროუნდმა ბელგიელ მწვრთნელს ჰკითხეს, თუ რა როლი ექნებოდა მიულერს 2025/2026 წლების სეზონში, რაზეც კომპანიმ უპასუხა, რომ მნიშვნელოვანი როლი არ ექნებოდა და სათამაშო დროც შეუმცირდებოდა.

კომპანიმ ასევე ისიც თქვა, რომ ტომასის ღვაწლს ბაიერნის წინაშე დიდ პატივს სცემს და ის კლუბის ნამდვილი ლეგენდაა.

სოციალურ ქსელში, გერმანული გრანდის ქომაგები აქტიურ პროტესტს მიმართავენ და მიულერის კიდევ 1 წლით დარჩენას ითხოვენ.

გერმანულ მედიაში ისიც გაჟღერდა, რომ შესაძლოა ტომასი მსოფლიო საკლუბო ჩემპიონატისთვის დატოვონ და მხოლოდ ამის შემდეგ გაუშვან გუნდიდან. ყველაფერს უახლოესი თვეები გაარკვევს.